Eurovision Mahnı Müsabiqəsi

Avroviziya Mahnı Müsabiqəsi (ing. Eurovision Song Contest; fr. Concours Eurovision de la chanson) — 1956-cı ildən bəri Avropa Yayım İttifaqına üzv olan ölkələr arasında keçirilən beynəlxalq mahnı müsabiqəsi. Avroviziya dünyanın ən uzun ömürlü musiqi hadisəsidir və buna görə də müsabiqənin adı 2015-ci ildə Ginnesin Rekordlar Kitabına düşüb. Müsabiqə 1951-ci ildən bəri təşkil olunan İtaliyanın məşhur Sanremo Musiqi Festivalının əsasında qurulub.

Avroviziya Mahnı Müsabiqəsi
ing. Eurovision Song Contest
Janr	mahnı müsabiqəsi
Müəllif	Marsel Bezenson
İstehsalçı	Avropa Yayım İttifaqı
Dil	İngiliscə, Fransızca
Buraxılış sayı	66 müsabiqə
İlk buraxılış	1956
İstehsal
Müddəti	2 saat (yarımfinallar) 3 saat 45 dəqiqə (final) 4 saat (2015 və 2016-cı ilin finalı) 4 saat 15 dəqiqə (2019-cu ilin finalı)
Veriliş
Təsvirin formatı	4:3 576i (SDTV) (1956–2004) 16:9 576i (SDTV) (2005) 1080i (HDTV) (2006–2013) 4k (UHDTV) (2013–indiyə kimi)
Translyasiya dövrü	24 may 1956
Xronologiyası
Oxşar verilişlər	Avroviziya Uşaq Mahnı Müsabiqəsi
eurovision.tv
Vikianbarda əlaqəli mediafayllar

Müsabiqədə iştirak edən hər bir ölkə Avropa Yayım İttifaqına canlı yayımda ifa olunacaq orijinal mahnı təqdim edir və şounun sonunda iştirak edən ölkələr arasında keçirilən səsvermədə ən çox səs toplayan mahnı müsabiqənin qalibi elan edilir. Müsabiqə 1956-cı ildən bəri hər il altmış altı dəfə keçirilib. Avroviziya eyni zamanda dünyanın ən çox baxılan qeyri-idman hadisələrindən biridir. Müsabiqənin izləyici kütləsi hər il 100 milyon və 600 milyon arasında dəyişir. Avroviziya həmçinin Avropadan kənarda yerləşən müəyyən ölkələrdə də yayımlanır; Amerika Birləşmiş Ştatları, Kanada, Yeni Zelandiya, Qazaxıstan və s. Avroviziya tarixində Avropadan kənar ölkələrdən ilk dəfə 2015-ci ildə Avroviziyanın 60 illiyi münasibətilə müsabiqəni uzun illər yayımlayan və böyük izləyici kütləsinə malik olan Avstraliyaya müsabiqədə qonaq olaraq iştirak etmək hüququ verilmişdir. Avstraliyanın Avroviziyada iştirakı sadəcə bir il nəzərdə tutulsa da, qazandığı uğurlu nəticələr səbəb göstərilərək növbəti ilərdə də müsabiqədə iştirakına AYİ tərəfindən icazə verilmişdir. Avroviziya 2000-ci ildən başlayaraq internetdə də yayımlanmağa başlamışdır.

Adətən Avroviziyada qalibiyyət qazanan müğənnilər sadəcə müsabiqə çərçivəsində şöhrət qazana bilir. İndiyədək müsabiqədə qələbə qazanan yalnız ABBA qrupu (İsveç 1974) və Selin Dion (İsveçrə 1988) müsabiqədən sonra öz musiqi karyeralarını dünya arenasına çıxara biliblər.

İrlandiya və İsveç müsabiqədə ən çox qalibiyyət əldə edən ölkədir. Belə ki, İrlandiya müsabiqədə beş ildə dörd dəfə (1992, 1993, 1994 və 1996), ümumilikdə isə yeddi dəfə qələbə qazanıb. Müsabiqənin müasir səsvermə metodu ilə 2017-ci ildə Portuqaliya təmsilçisi və eyni zamanda müsabiqənin qalibi Salvador Sobral ən çox səs (758 xal) toplamışdır. 2016-cı ildən öncəki səsvermə metodu ilə isə 2009-cu ildə Norveçi təmsil edən Aleksandr Rıbak ən çox səs (387 xal) toplayaraq müsabiqənin qalibi olmuşdur.

Tarix

Əsas məqalə: Avroviziya Mahnı Müsabiqəsinin tarixi

XX əsrin 50-ci illərinin ortalarında Avropa Yayım İttifaqının (AYİ) üzvləri İkinci dünya müharibəsinin ardınca özünü toparlamağa çalışan Avropa ölkələrini yenidən bir araya gətirmək üçün baxımlı əyləncəli proqram yaratmaq fikrinə düşdülər. 1955-ci ilin yanvarında Monakoda keçirilən konfransda İsveçrə televiziyasının direktoru Marsel Bezanson Avropanın ən yaxşı mahnısını təyin edən beynəlxalq müsabiqənin keçirilməsini təklif etdi. Marsel ideyanın 1951-ci ildən bəri təşkil olunan İtaliyanın məşhur Sanremo Musiqi Festivalından əsaslandığını bildirmişdir. Onun təklifi AYİ-nın 1955-ci il 19 oktyabr tarixində Romadakı Assambleyasında bəyənilmişdir. İlkin olaraq "Qran-pri Avroviziya" (ing. Eurovision Grand Prix) adlanan müsabiqə, ilk dəfə 24 may 1956-cı ildə İsveçrənin Luqano şəhərində keçirilmişdir.

İlk müsabiqə 24 may 1956-cı ildə İsveçrənin Luqano şəhərində yeddi ölkənin iştirakı ilə keçirilmişdir. Müsabiqədə iştirak edən hər bir ölkə iki mahnı ilə çıxış etmişdir. Bu hər ölkənin birdən artıq mahnı ilə iştirak etdiyi ilk və son müsabiqə olmuşdur. Müsabiqədə ev sahibi ölkə İsveçrənin təmsilçisi Liz Assia ifa etdiyi "Refrain" mahnısı ilə qalib gəlmişdir.

Format

Müsabiqənin qaydaları mövcud olduğu dövr ərzində bir neçə dəfə dəyişilmişdir. Lakin müəyyən qaydalar illər ərzində dəyişməz olaraq qalmışdır. Müsabiqədə ifa edilən mahnılar orijinal olmalı və təyin edilmiş zamandan öncə heç bir yerdə səslənilməməlidir. Ölkə tərəfindən təqdim edilən mahnı müsabiqədə canlı olaraq ifa edilməlidir. Müsabiqədə iştirak etmək üçün ölkənin dövlət kanallarından biri Avropa Yayım İttifaqına üzv olmalıdır. Müsabiqə iştirakçı ölkələrdən birində keçirilməlidir. Müsabiqə zamanı bütün mahnılar ifa edildikdən sonra ölkələr bəyənilən mahnılara öz səslərini təqdim etməlidir. Ölkələr öz təmsilçilərinə səs verə bilməzlər. Bütün səslər ölkə üzrə hesablanır (yəni İrlandiyada yığılan səslər ayrı, İsveçdə ayrı, Fransada ayrı hesablanır). Müsabiqənin sonunda ən çox səs qazanan ölkə, mahnı həmin müsabiqənin qalibi elan edilir. Qalib təmsilçi Avroviziya kubokunu əldə edir və qalib ölkə gələn müsabiqəyə ev sahibliyi etmək hüququ qazanır.

Avroviziya Mahnı Müsabiqəsinin yayımından əvvəl və sonra səsləndirilən musiqi parçası — Mark Antuan Şerpantyenin "Te Deum" (Səni, Tanrını mədh edirik) mahnısına müqəddimədir.

Müsabiqənin finalı Qərbi Avropa yay vaxtı ilə may ayında, saat 21:00-da keçirilir. Adətən ildə bir dəfə şənbə günündə keçirilən müsabiqədə 2004-cü ildən başlayaraq iştirakçı ölkələrin sayının artması səbəbi ilə cümə axşamı keçirilən yarımfinal mərhələsi tətbiq olundu. 2007-ci ilin 28 sentyabr tarixində qəbul edilən qərara əsasən 2008-ci ildən başlayaraq müsabiqədə iki yarımfinal olacağı və finala yalnız ev sahibi və Böyük Dördlüyə daxil olan ölkələr (Böyük Britaniya, Almaniya, Fransa, İspaniya) birbaşa keçəcəyi təsdiqini tapmışdır. Daha sonra İtaliyanın da müsabiqəyə qayıtması ilə "Böyük Dördlük" "Böyük Beşlik"lə əvəz olunmuşdur. Avroviziya adətən may ayında keçirilsə də, öncəki illərdə mart və aprel aylarında da müsabiqə keçirilirdi.

İştirak

1956-cı ildən bəri iştirakçılar:

  Ən azı 1 dəfə iştirak edənlər

  İştirak etmək haqqı olub, bundan istifadə etməyənlər

  İştirakı elan olunub sonradan ləğv edilənlər

Avropa Yayım İttifaqının fəal üzvü olan hər bir ölkə (hətta Avropadan kənar olsa da belə) müsabiqədə iştirak etmək hüququna malikdir. Bu ölkələr Avropa yayım ərazisinə daxil olan ölkələr və ya Avropa Şurasına üzv ölkələrdir. Müsabiqənin Avropadan kənar iştirakçılarına misal olaraq Qərbi Asiyada yerləşən, 1973-cü ildən bəri iştirak edən İsraili və 1981-ci ildən bəri iştirak edən Kipri, Şimali Afrikada yerləşən və yalnız bir dəfə 1980-ci ildə iştirak edən Mərakeşi və eyni zamanda 2015-ci ildən bəri müsabiqədə iştirak edən Avstraliyanı misal göstərmək olar.

Müsabiqədə iştirak etmək istəyən AYİ-nin fəal üzvləri müsabiqənin qaydaları ilə razılaşmalı və eyni zamanda Avropa Yayım İttifaqına müvafiq məbləğdə ödəniş etməlidir. İndiyədək müsabiqədə 52 ölkə iştirak etmişdir. Aşağıda göstərilən siyahıda ölkələr müsabiqədə ilk iştiraklarına görə sıralanmışdır.

İl	Debüt edən ölkələr
1956	Almaniya, Belçika, Fransa, İsveçrə, İtaliya, Lüksemburq, Niderland
1957	Avstriya, Böyük Britaniya, Danimarka
1958	İsveç
1959	Monako
1960	Norveç
1961	Finlandiya, İspaniya, ^a
1964	Portuqaliya
1965	İrlandiya
1971	Malta
1973	İsrail
1974	Yunanıstan
1975	Türkiyə
1980	Mərakeş
1981	Kipr
1986	İslandiya
1993	Bosniya və Herseqovina, Sloveniya, Xorvatiya
1994	Estoniya, Litva, Macarıstan, Polşa, Rumıniya, Rusiya, Slovakiya
1998	Şimali Makedoniya
2000	Latviya
2003	Ukrayna
2004	Albaniya, Andorra, Belarus, ^b
2005	Bolqarıstan, Moldova
2006	Ermənistan
2007	Çexiya, Gürcüstan, Monteneqro, Serbiya
2008	Azərbaycan, San-Marino
2015	Avstraliya^c

a) Yuqoslaviya Sosialist Federativ Respublikası parçalanmazdan əvvəl 1961-ci ildən 1992-ci ilə kimi müsabiqədə iştirak etmişdir. Yuqoslaviyanın tərkibində olan Bosniya və Herseqovina, Sloveniya, Xorvatiya, Şimali Makedoniya və Serbiya və Monteneqronun müstəqillik əldə etməsindən sonra Yuqoslaviyanın iştirakı Avroviziyada sona çatmışdır.

b) 1992-ci ildə Yuqoslaviya Sosialist Federativ Respublikasının parçalanmasının ardınca müstəqillik qazanan Serbiya və Monteneqro 2004-cü ildə Avroviziyaya qoşulmuşdur. Lakin daha sonra Serbiya və Monteneqro iki müstəqil dövlətlərə ayrılmış və hər iki ölkə 2007-ci ildə müsabiqəyə qoşulmuşdur.

c) 2015-ci ildə Avroviziya Mahnı Müsabiqəsinin 60 illiyi münasibətilə uzun illər boyunca müsabiqəni yayımlayan və böyük izləyici kütləsinə malik olan Avstraliyanın müsabiqədə iştirakına Avropa Yayım İttifaqı tərəfindən izin verilmişdir. Avstraliyanın müsabiqədə iştirakı bir illik nəzərdə tutulsa da, növbəti illərdə də qitə-ölkənin Avroviziyada iştirakı baş tutmuşdur.

Ev sahibliyi

Düsseldorfda keçirilən Avroviziya 2011-in açılışı

Avroviziyanın əsas maliyyə dəstəkçiləri müxtəlif reklam şirkətləri və müsabiqədə iştirak edən ölkələrdir. Müsabiqəyə ev sahibliyi etmək şansı ölkələrin müsbət cəhətdən Avropa və dünyaya tanıdılması, təbliğatı və eyni zamanda ölkələrə turistlərin cəlb edilməsi üçün böyük fürsət hesab edilir. İlk iki müsabiqəyə İsveçrə və Almaniya ev sahibliyi etdikdən sonra müsabiqəyə ev sahibliyi hüququnun ötən müsabiqədə qələbə qazanan ölkəyə həvalə edilməsi qərara alındı. Bu qərarın ardınca 1957 Avroviziya Mahnı Müsabiqəsində Niderland qalibiyyət əldə etdi və ölkə 1958-ci ildə müsabiqəyə ev sahibliyi etməyə razılıq verdi. Avroviziya tarixində hər il ötən müsabiqənin qalibi ev sahibliyi etsə də, yalnız beş dəfə bu fürsətdən imtina edilmişdir.

• 1960 — Niderland maliyyə səbəblərindən müsabiqəyə ev sahibliyi etməkdən imtina etmişdir və Böyük Britaniya ev sahibliyini öz üzərinə götürmüşdür.
• 1963 — Fransa maliyyə səbəblərindən müsabiqəyə ev sahibliyi etməkdən imtina etmişdir və yenidən Böyük Britaniya ev sahibliyini öz üzərinə götürmüşdür.
• 1972 — Monako maliyyə səbəblərindən müsabiqəyə ev sahibliyi etməkdən imtina etmişdir və yenidən Böyük Britaniya ev sahibliyini öz üzərinə götürmüşdür.
• 1974 — Lüksemburq maliyyə səbəblərindən müsabiqəyə ev sahibliyi etməkdən imtina etmişdir və növbəti dəfə Böyük Britaniya ev sahibliyini öz üzərinə götürmüşdür.
• 1980 — İsrail maliyyə səbəblərindən müsabiqəyə ev sahibliyi etməkdən imtina etmişdir və Niderland ev sahibliyini öz üzərinə götürmüşdür.

Avroviziyada iştirak edən ölkələrdən yalnız Avstraliyaya qalib gələcəyi halda belə müsabiqəyə ev sahibliyi etmək hüququ verilmir. Buna səbəb isə Avstraliyanın Avropadan uzaqda yerləşməsidir. Qitənin müsabiqəyə ev sahibliyi etməsi müsabiqənin xərclərinin artmasına səbəb ola biləcəyi və bir çox ölkələrin maliyyə çətinliklərindən dolayı iştirak edə bilməyəcəyi düşünülür. Buna görə də, Avstraliyanın Avroviziyada qalib gəldiyi halda Avstraliyaya gələn il müsabiqəyə hansı Avropa ölkəsinin ev sahibliyi edəcəyi seçimi həvalə edilir..

Avroviziya loqosu

Ənənəvi Avroviziya loqosu 2004-cü ildə İstanbulda keçirilən müsabiqədə təqdim edilmişdir. Loqoda V hərfi ürək formasında dizayn edilərək, ev sahibi ölkənin bayrağı həmin ürəyin içində görünürdü. Ənənəvi loqo son dəfə 2014-cü ildə istifadə edilmiş və artıq 2015-ci ildə Vyanada keçirilən müsabiqədə Avroviziyanın 60 illiyi münasibətilə Kornelis Yakobs tərəfindən hazırlanan müasir loqo izləyicilərə təqdim edilmişdir.

Avroviziya şüarı

Tallində keçirilən 2002 Avroviziya Mahnı Müsabiqəsindən bəri hər il müsabiqənin özünəməxsus şüarları olur. Yalnız 2009-cu ildə Moskvada keçirilən müsabiqədə heç bir şüar təqdim edilməmişdi.

İl	Ev sahibi ölkə	Ev sahibi şəhər	Şüar	Tərcümə
2002	Estoniya	Tallin	A Modern Fairytale	Müasir pəri nağılı
2003	Latviya	Riqa	Magical Rendezvous	Sehirli görüş
2004	Türkiyə	İstanbul	Under The Same Sky	Eyni səma altında
2005	Ukrayna	Kiyev	Awakening	Oyanış
2006	Yunanıstan	Afina	Feel The Rhythm!	Ritmi hiss et!
2007	Finlandiya	Helsinki	True Fantasy	Əsl xəyal
2008	Serbiya	Belqrad	Confluence of Sound	Səslərin birləşməsi
2010	Norveç	Oslo	Share The Moment!	Anı paylaş!
2011	Almaniya	Düsseldorf	Feel Your Heart Beat!	Qəlbinin döyüntüsünü hiss et!
2012	Azərbaycan	Bakı	Light Your Fire!	Öz məşəlini alovlandır!
2013	İsveç	Malmö	We Are One	Biz birik
2014	Danimarka	Kopenhagen	#JoinUs	Bizə qoşul
2015	Avstriya	Vyana	Building Bridges	Körpülər salaraq
2016	İsveç	Stokholm	Come Together	Bir araya gələk
2017	Ukrayna	Kiyev	Celebrate Diversity	Fərqliliyi qeyd et
2018	Portuqaliya	Lissabon	All Aboard!	Hamı göyərtəyə!
2019	İsrail	Təl-Əviv	Dare to Dream	Xəyal etməyə cəsarət et
2020	Niderland	Rotterdam	Open up	Açılış
2021	Niderland	Rotterdam	Open up	Açılış
2022	İtaliya	Turin	Sound of beauty	Gözəlliyin səsi
2023	Böyük Britaniya / Ukrayna	Liverpul	United By Music	Musiqi ilə birləşmiş
2024	İsveç	Malmö	United By Music	Musiqi ilə birləşmiş

Avroviziya həftəsi

Avroviziya 2010-un qalibi Lena Oslo səhnəsində məşqlərdə

Avroviziya həftəsi (ing. Eurovision Week) müsabiqənin keçirildiyi həftədir və həftə ərzində müsabiqədə iştirak edəcək olan ölkələrdən nümayəndə heyətləri ev sahibi ölkəyə gəlirlər. Müsabiqə üçün hazırlıqlarını tamamlayan ifaçılar son olaraq Avroviziya həftəsində müsabiqə üçün nəzərdə tutulmuş səhnədə öncədən təyin edilmiş cədvəllərə əsasən məşqlər həyata keçirirlər. Məşqlər zamanı hər bir performansın canlı yayımda lazımi şəkildə izləyiciyə çatdırılması üçün səs, kamera, işıqlar və ümumilikdə şouda yer alacaq ən kiçik nüans belə öncədən məşqlərdən keçirilir. Hər bir ölkəyə yarımfinaldan öncə üç dəfə (hər biri yarım saat olmaqla) Avroviziya səhnəsində məşq etmə fürsəti verilir. Eyni zamanda finala keçən ölkələr üçün finaldan öncə iki dəfə məşq etmək üçün şərait yaradılır. Yarımfinaldan öncə keçirilən üçüncü məşq və finaldan öncə keçirilən ikinci məşqlər eyni zamanda Münsif finalı adlanır. Bu məşqləri bütün ölkələrdən olan münsiflər heyəti izləyir və münsiflər öz səslərini məhz bu məşqlərə əsasən müsabiqədən öncə verirlər.

Hər bir ölkənin nümayəndə heyəti məşqlərini bitirdikdən sonra mətbuat konfransında iştirak edir və müxtəlif ölkələrdən gələn jurnalistlərin fikirləri dinlənilir və eyni zamanda suallara cavab verilir.

Avroviziya həftəsində hər axşam məşqlərdən sonra nümayəndə heyətləri, jurnalistlər və akkreditə olunmuş müsabiqə fanatları üçün təyin edilmiş gecə klublarında şənliklər təşkil edilir.

Qaydalar

Müsabiqənin qaydaları mövcud olduğu dövr ərzində bir neçə dəfə dəyişilmişdir. Lakin müəyyən qaydalar illər ərzində dəyişməz olaraq qalmışdır. Müsabiqənin əsas qaydaları aşağıda göstərilmişdir.

Canlı musiqi

Qaydalara əsasən hər bir mahnıda vokal olması mütləqdir və hər bir mahnının vokalı canlı olaraq ifa edilməlidir. Musiqidə arxa planda heç bir vokalın yer almasına icazə yoxdur. Belə ki, ilk dəfə bu qayda 1999-cu ildə Xorvatiya təmsilçisi Doris Draqoviç tərəfindən pozulmuşdur. Müğənninin ifa etdiyi mahnının arxa planında insan səsinə bənzər səslər yer almışdı. Xorvatiyanın nümayəndə heyəti həmin səslərin insan səsləri olmadığını iddia etmələrinə baxmayaraq, Avropa Yayım İttifaqı finalda Xorvatiyanın qazandığı səslərin 33%-ni ləğv etmişdir.

1956-cı ildən 1998-ci ilə kimi ev sahibi ölkə müsabiqəni canlı orkestr ilə təmin etməli idi. 1973-cü ildən öncə hər bir ölkənin təqdim etdiyi mahnı canlı orkestr ilə ifa edilməli idi. Daha sonra bu qayda ləğv edilsə də, 1999-cu ilə kimi hər bir ev sahibi ölkə yenə də müsabiqəni canlı orkestr ilə təmin etmişdir. Eyni zamanda 1997-ci ilə kimi mahnılarda istifadə olunan musiqi alətlərinin səhnədə yer alması önəmli qaydalardan biri hesab edilirdi. Lakin 1997-ci ildə bu qayda qüvvədən düşdü.

Dil

Müsabiqənin keçmiş qaydalarına əsasən müsabiqədə iştirak edən ölkələrin təqdim etdikləri mahnılar öz dillərində ifa edilməli idi. Lakin müəyyən illərdə bu qayda qüvvədən düşmüş, daha sonra yenidən bərpa olunmuşdur. 1956-cı ildən 1966-cı ilə kimi Avroviziya qaydalarında dillərlə bağlı bir bölmə olmamasına baxmayaraq, iştirak edən bütün ölkələr öz rəsmi dillərində mahnılarını təqdim edirdilər. Bu ənənə ilk dəfə 1965-ci ildə İsveç təmsilçisi İnqvar Vikselin ingilis dilində ifa etdiyi mahnı ilə pozulmuşdur. Bunun ardınca isə 1966-cı ildə müsabiqədə hər bir ölkənin səsləndirdiyi mahnının yalnız öz dilində olması ilə bağlı qərar qəbul edildi. Bu qayda 1973-cü ilə kimi qüvvədə qaldı və həmin ildə ölkələrə istənilən dildə mahnı ilə çıxış etmək azadlığı verildi. 70-ci illərin ortalarında bir neçə ölkə bu fürsətdən istifadə edib, ingilis dilində mahnılarla Avroviziyada təmsil olundu və hətta İsveçin 1974 Avroviziya Mahnı Müsabiqəsindəki təmsilçiləri ABBA qrupu ingilis dilində səsləndirdikləri mahnı ilə qələbə qazandılar.

1978-ci ildə Avropa Yayım İttifaqı dil barədə qaydanı yenidən bərpa etdi və müsabiqədə iştirak edən ölkələrdən yalnız öz dillərində mahnı göndərmək tələb olundu. 1999-cu ildə bu qayda ləğv edildi və nəticədə həmin müsabiqədə iştirak edən 23 ölkədən 12-si ingilis dilində mahnı ilə təmsil olundu. Avroviziyada Avropa dilləri ilə yanaşı Suahili dilində, Ərəb dilində və hətta Süni dildə də mahnılar səslənmişdir.

Səsvermə

Müsabiqənin səsvermə metodu illər ərzində bir neçə dəfə dəyişikliyə uğramışdır. Hal-hazırkı səsvermə sistemi 2016-cı ildən bəri qüvvədədir. Qaydalara görə hər bir ölkədən olan peşəkar münsif heyətinin keçirdiyi səsvermədə ən çox səs toplayan ölkə və eyni zamanda iştirak edən ölkələrdə ayrı-ayrı keçirilən SMS səsverməsində ən çox səs toplayan on ölkə 12, 10, 8–1 xallar əldə edir.

Müsabiqə tarixində 1997-ci ilə kimi iştirak edən bütün ölkələrin səsləri yalnız həmin ölkələrdən olan peşəkar münsif heyətinin qərarı ilə açıqlanırdı. İlk dəfə telesəsvermə 1997-ci ildə Almaniya, Avstriya, Böyük Britaniya, İsveç və İsveçrədə həyata keçirilmişdir. Bunun ardınca isə 1998-ci ildən etibarən bütün ölkələr səsverməni xalqın seçiminə görə təqdim etməyə başladılar. Hər hansısa bir ölkədə SMS səsverməsində problem yarandığı halda ölkələr öncədən ehtiyat münsif səsverməsi də keçirirdilər. 2013-cü ildən etibarən insanlar eyni zamanda mobil proqram vasitəsilə də Avroviziya səsverməsində iştirak edə bilirlər.

İlk dəfə 2009-cu ilin final mərhələsində Avropa Yayım İttifaqı 50% SMS səsverməsi ilə 50% peşəkar münsif səsverməsi metodunu təcrübədən keçirmişdir. Belə ki, müsabiqədə iştirak edən hər bir ölkə münsif səslərini SMS səsləri ilə birlikdə toplayaraq ümumi nəticə çıxarır və ümumi nəticədə ən çox səs toplayan on ölkə 12, 10, 8–1 xallar əldə edirdi. Bunun ardınca növbəti illərdə eyni metod həm yarımfinallar, həm də final üçün qayda halını aldı.

2016-cı ildən etibarən isə 50% SMS səsverməsi ilə 50% peşəkar münsif səsverməsi qaydasında müəyyən dəyişikliklər edildi. Belə ki, yeni səsvermə metoduna əsasən ölkələrdə səsverən peşəkar münsif heyətinin səsverməsi ayrılıqda, SMS səsverməsi isə ayrılıqda hesablanır. Səsvermənin gedişatında ilk öncə səs verən ölkələr ev sahibi ölkə ilə bağlantı yaradır və ölkədə münsiflər arasında aparılan səsvermədə ən çox bəyənilən on ölkəyə olan xallar açıqlanır. Ölkələrin münsif səsverməsi sona çatdıqdan sonra isə müsabiqənin aparıcıları ölkələrdə keçirilən SMS səsverməsinin nəticələrini açıqlayırlar. Aparıcılar telesəsvermədə ən az səs toplayan ölkədən başlayaraq, ən çox səs toplamış ölkəyədək bütün xalları izləyicilərə çatdırırlar. Nəticə də həmin xallar ölkələrin daha öncə elan etdiyi münsif səsləri ilə toplanır və ən çox səs toplayan ölkə, mahnı müsabiqəsinin qalibi elan edilir.. Oxşar səsvermə metodu İsveçdə keçirilən ənənəvi Melodifestivalen mahnı müsabiqəsində həyata keçirilir. Məhz bu ideyanı da Avropa Yayım İttifaqına Melodifestivalenin direktoru Krister Byörkman təklif etmişdir. Byörkmana görə bu səsvermə metodu müsabiqəyə əlavə həyəcan qatır və müsabiqənin qalibi şounun sonunadək sürpriz olaraq qalır. Öncəki səsvermə metodu ilə isə qalib səsvermənin gedişatında artıq bəlli olurdu.

Avroviziyada səslər açıqlanmazdan öncə bütün səslər Avropa Yayım İttifaqının Avroviziya üzrə nümayəndəsi, müsabiqənin direktoru tərəfindən yoxlanılır. Müəyyən hallarda müsabiqənin direktoru ölkənin münsif səsverməsini (bir ölkədən olan münsiflərin verdiyi səslərin ayrılıqda bir-birinə çox bənzər olması halında) və ya SMS səsverməsini (səslərin az olduğu halda) ləğv edir və həmin ölkənin səsləri xüsusi komitənin verdiyi səslərlə əvəz edilir. Aşağıdakı cədvəldə müsabiqə tarixində Avroviziyaya rəhbərlik edən şəxslər göstərilmişdir.

Ölkə	Ad	İl(lər)
İsveçrə	Rolf Libermann	1956–57
Yuqoslaviya	Miroslav Vilçek	1964–65
Birləşmiş Krallıq	Klifford Braun	1966–77
İsveçrə	Frank Naef	1978–92
Danimarka	Kristian Klausen	1993–95
Fransa	Kristin Marşal-Ortiz	1996, 1998–2002
	Mari-Kler Vionne	1997
Birləşmiş Krallıq	Sara Yuen	2003
İsveç	Svante Stokselius	2004–2010
Norveç	Yon Ola Sand	2011–2020
İsveç	Martin Österdal	2021–

Bərabərlik qaydası

1969-cu ildə müsabiqədə iştirak edən 16 ölkədən dördü 18 xalla birinci yerdə qərarlaşmışdır. Həmin ilədək Avroviziyada oxşar hadisə ilə rastlaşılmadığı üçün səslərin bərabərliyi vəziyyəti ilə bağlı müsabiqədə ümumi qayda yox idi. Nəticə olaraq, birinci yerdə qərarlaşan dörd ölkənin (Fransa, İspaniya, Böyük Britaniya və Niderland) hər biri həmin müsabiqənin qalibi elan edilmişdirlər. Finlandiya, İsveç, Norveç və Portuqaliya nümayəndələri nəticəyə etirazlarını bildirərək növbəti müsabiqədə iştirakdan imtina etmişdirlər. Bunun ardınca Avropa Yayım İttifaqı xoşagəlməz hadisənin bir daha təkrarlanmaması üçün Avroviziyada bərabərlik qaydası yaratdı.

Bərabərlik qaydasına əsasən səsvermənin sonunda eyni xalla birincilikdə qərarlaşan ölkələrdən ən çox 12 xal qazananı müsabiqənin qalibi elan edilir. 12 xalların sayının bərabərliyi halında isə ən çox 10, 8, 7–1 xal qazanan ölkə müsabiqədə qələbə qazanmış olur.

Avroviziya 1969-da baş verən bənzər hadisə ikinci dəfə 1991-ci ildə baş verdi. Belə ki, səsvermənin sonunda Fransa və İsveç təmsilçiləri 146 xalla birincilikdə qərarlaşdılar. Hər iki ölkə bərabər sayda 12 xal qazansa da, Fransa təmsilçisi dörd 10 xal, İsveç təmsilçisi isə beş 10 xal qazanmışdı. Nəticə olaraq, İsveç təmsilçisi Karola müsabiqənin qalibi elan edilmişdir. Qeyd edək ki, bərabərlik qaydası 1969-cu ildə tətbiq olunsaydı, yalnız Fransa təmsilçisi həmin müsabiqənin qalibi olmalı idi.

Yayım

Müsabiqədə iştirak edən hər bir ölkənin yayım hüququna malik olan telekanalı müsabiqəni canlı olaraq fasiləsiz yayımlamalıdır. Yalnız fasilə aktı zamanı telekanallara qısa reklam fasiləsinə ayrılmağa imkan yaradılır. Bu qayda ilk dəfə 2009-cu ildə İspaniya telekanalı tərəfindən pozulmuşdur. Belə ki, müsabiqənin yayımlandığı zaman İspaniyanın TVE kanalı ekranda ölkədə keçirilən 2009 Madrid Tennis Turnirinin gedişatı ilə bağlı məlumat verən alt yazılar yayımlamışdır. Nəticədə telekanal müsabiqənin təşkilat komitəsi tərəfindən cərimələnmiş və müvafiq məbləğdə pul cəzası Avropa Yayım İttifaqına ödənilmişdir..

Digər qaydalar

• 1956-cı ildə ilk keçirilən Avroviziyada ölkələrə təqdim olunan mahnıların 3 dəqiqə 30 saniyədən artıq olmaması ilə bağlı məsləhət verilmişdi. Lakin etirazlara baxmayaraq, 1957-ci ildə İtaliya 5 dəqiqədən artıq mahnı ilə müsabiqədə təmsil olunmuşdu. Bunun ardınca növbəti ildən etibarən Avroviziyada mahnıların 3 dəqiqədən artıq olmaması ilə bağlı qərar qəbul edilmişdir.. Bu qayda indiyədək müsabiqədə qüvvədə qalmaqdadır.
• Müsabiqədə iştirakçı ölkələrin təmsilçilərinin və ya bəstəkarların milliyəti ilə bağlı heç bir qayda olmamasına baxmayaraq, müəyyən ölkələr üçün nümayəndələrinin öz milliyətlərindən olması əsas qaydalardan hesab olunur.
• Qaydalara əsasən hər ifanı səhnədə yalnız 6 nəfər müşayiət edə bilər.
• Hər hansısa bir siyasi və ya reklam xarakteri daşıyan mahnıların müsabiqədə iştirakına icazə yoxdur.
• 1990-cı ildən etibarən alınan qərara əsasən səhnədə yer alan hər bir iştirakçının ən azı 16 yaşı olmalıdır.
• Səhnədə heyvanların yer almasına icazə yoxdur.
• Bir ifaçı bir il ərzində yalnız bir ölkəni təmsil edə bilər.
• Müsabiqəyə təqdim olunan mahnının musiqisi və ya sözləri müsabiqənin keçirildiyi vaxtdan səkkiz ay öncə heç bir yerdə səsləndirilməməlidir.

Siyasi məsələlər

1978 Cənubi Livan münaqişəsindən bir ay sonra Parisdə keçirilən 1978 Avroviziya Mahnı Müsabiqəsini canlı yayımlayan İordaniya telekanalı İsrail təmsilçiləri səhnə aldığı zaman reklam fasiləsinə ayrılmışdır. Müsabiqənin sonunda səsvermənin gedişatı zamanı İsrail təmsilçisinin liderliyi ələ aldığı anda İordaniya telekanalı ümumiyyətlə müsabiqənin yayımını dayandırmışdır. Hadisənin ardınca İordaniya qəzetlərində müsabiqənin qalibi olaraq əslində ikinci yeri qazanan Belçika göstərilmişdir. Növbəti illərdə isə İordaniyada Avroviziya bir daha yayımlanmamışdır.

2005-ci ildə Kiyevdə keçirilən müsabiqədə Livan telekanalı ilk dəfə iştirak etmək istəmişdir. Hətta müsabiqə üçün təmsilçi və mahnı seçilsə də, ölkənin Avroviziya 2005-də iştirakı baş tutmamışdır. Buna səbəb Livan telekanalının Avropa Yayım İttifaqı ilə İsrailin ifasının Livanda yayımlanmaması ilə bağlı razılığa gələ bilməməsi idi. İsrailin iştirakını yayımlamaqdan imtina edən Livan daha sonra müsabiqədə iştirak etməyəcəyini açıqlamışdır. Lakin müsabiqədə iştirakını təsdiqləyib, daha sonra iştirakdan imtina etdiyinə görə Livan telekanalı Avropa Yayım İttifaqı tərəfindən cərimələnmişdir.

Gürcüstanı 2009 Avroviziya Mahnı Müsabiqəsində təmsil etməli olan Stefane və 3G qrupunun ifa etməli olduğu "We Don't Wanna Put In" mahnısında Rusiya prezidenti Vladimir Putini tənqid xarakterli sözlərdən istifadə edilmişdir. İngilis dilində səslənən mahnının adının digər tərcüməsi "Biz Putini İstəmirik" idi. Mahnı Rusiya mətbuatı tərəfindən narazılıqla qarşılanmışdır. Avropa Yayım İttifaqı Gürcüstan televiziyasından ya mahnını tamamən dəyişmək, ya da sözlərində düzəlişlər aparmağı tələb etmişdir. Lakin Gürcüstan nəticə olaraq Moskvada keçirilən müsabiqədə iştirakdan imtina etmək qərarına gəlmişdir.

2012-ci ildə Bakıda keçirilən müsabiqədə ilkin olaraq Ermənistanın iştirak edəcəyi öz təsdiqini tapsa da, müsabiqənin keçirilməsinə iki ay qalmış Ermənistan telekanalı ölkənin müsabiqədə iştirak etməyəciyini açıqlamışdır. Telekanal açıqlamasında buna səbəbin təhlükəsizliklə bağlı narahatlıq olduğunu bildirmişdir. Müsabiqədə iştirakını təsdiqləyib, daha sonra iştirakdan imtina etdiyinə görə Ermənistan telekanalı Avropa Yayım İttifaqı tərəfindən müvafiq məbləğdə pul cəzası ilə cərimələnmişdir. Eyni zamanda telekanaldan Bakıda keçirilən müsabiqənin finalını fasiləsiz olaraq yayımlamaq tələb olunmuşdur.

Ukrayna 2016 Avroviziya Mahnı Müsabiqəsində Camalanın ifa etdiyi "1944" mahnısı ilə təmsil olunmuşdur. Rus şərhçilər mahnının İosif Stalinin əmri ilə baş tutmuş Krım tatarlarının deportasiyasına aid olduğunu və bu tip siyasi mövzuda olan mahnının müsabiqənin qaydalarını kobud şəkildə pozduğunu bildirmişdirlər. Lakin mahnıda hansısa birbaşa siyasi mesaj olmaması səbəbindən mahnının Avroviziyanın qaydalarını pozmadığı daha öncə Avropa Yayım İttifaqı tərəfindən təsdiqlənmişdir. Müsabiqənin qalibi Camala da verdiyi müsahibələrdə ifa etdiyi və bəstələdiyi mahnının siyasi mövzuda olmadığını və mahnını yazmaqla əsas məqsədinin 1944-cü ildə nənəsinin yaşadığı acıları, dəhşətli anları dinləyiciyə çatdırmaq olduğunu bildirmiş və mahnının onun üçün yalnız şəxsi anlam daşıdığını vurğulamışdır. Ukraynanın müsabiqədə qalib gəlməsinin ardınca Rusiya Kiyevdə keçirilən müsabiqədə iştirakını təsdiqləsə də, müəyyən Rus siyasətçiləri ölkənin müsabiqədə iştirakdan imtina etməyə çağırmış və buna səbəb kimi Rusiyanın Ukraynada xoşagəlməz qonaq olacağı göstərilmişdir.

Ev sahibi ölkə ilə ciddi siyasi münaqişədə olmasına baxmayaraq Rusiyanın Avroviziya 2017-də "Flame is Burning" (azərb. Məşəl alovlanır‎) adlı mahnı ilə Yuliya Samoylovanın təmsil edəcəyi açıqlanmışdır. Lakin Ukrayna Təhlükəsizlik Xidmətinin Yuliyanın Ukrayna qanunlarını pozaraq Krıma Rusiyadan giriş etməsi ilə bağlı iddialar üzərində araşdırma başladığı məlumatı verilmişdir. Müğənni Krım yarımadasının Rusiya tərəfindən zəbtindən sonra 2015-ci ildə Krımın Kerç şəhərində baş tutan konsertdə çıxış etmişdir. Ukrayna rəsmiləri Rusiyanın Samoylovanı müsabiqəyə göndərmək qərarının siyasi addım olduğunu bildirərək, Rusiyanın növbəti siyasi qalmaqal yaratmaq istədiyindən Krıma qeyri-qanuni yolla giriş edən müğənnini müsabiqə üçün seçilməsinin düşünülmüş addım olduğu iddia edilmişdir. Rusiya tərəfi bu iddiaları təkzib etmiş və bunun arxasında heç bir siyasi məqam olmadığı açıqlanmışdır. 22 mart tarixində Ukrayna Təhlükəsizlik Xidməti rəsmi olaraq Yuliya Samoylovanın ölkəyə girişinə 3 illik qadağa qoyulduğunu bəyan etmişdir. Bunun ardınca Rusiyaya müsabiqəyə başqa bir müğənni göndərmək fürsəti verilsə də Rusiya Kiyevdə keçirilən müsabiqədə iştirakdan imtina etmişdir.

Müsabiqənin genişləndirilməsi

Avroviziyada iştirak edən ölkələr, müsabiqəyə qoşulduqları onilliklərə görə rəngləniblər.

Müsabiqədə iştirakçı ölkələrin sayı zaman keçdikdə artmağa başlamışdır. 1956-cı ildə cəmi 7 ölkənin iştirakı ilə başlayan müsabiqədə 80-ci illərdə artıq 20-dən çox ölkə iştirak edirdi. Yuqoslaviya Sosialist Federativ Respublikasının və Sovet Sosialist Respublikaları İttifaqının parçalanmasından sonra Avroviziyada iştirak edən ölkələri daha da çoxalmağa başlamışdır. Müasbiqənin keçirildiyi son onillikdə hər il 40-dan çox ölkə müsabiqədə iştirak etmişdir.

İştirak üçün seçim turları

1993-cü ildə müsabiqəyə ilk dəfə qoşulmaq istəyən ölkələrin çoxluğunu nəzərə alan Avropa Yayım İttifaqı müsabiqədə iştirak üçün Sloveniyanın paytaxtı Lyublyanada "Kvalifikacija za Milstreet" adlı seçim turu təşkil etmişdir. Həmin illərdə Avroviziyanın ildə cəmi bir gün keçirildiyinə görə müsabiqənin yayım vaxtı 25 ölkədən artıq iştirakçının olmasına şərait yaratmırdı. Bosniya və Herseqovina, Estoniya, Macarıstan, Rumıniya, Slovakiya, Sloveniya və Xorvatiyanın iştirak etdiyi seçim turunda üç keçmiş Yuqoslaviya ölkələri olan Bosniya və Herseqovina, Sloveniya və Xorvatiya qalib gələrək, ilk dəfə Avroviziyaya qoşulmuşdurlar. Bunun ardınca digər ölkələrində Avroviziyada iştirakını təmin etmək üçün AYİ 1993-cü ildən 2004-cü ilə kimi hər il müsabiqədə son beşlikdə qərarlaşan ölkələri növbəti il müsabiqədən uzaqlaşdıraraq, digər iştirak etmək istəyən ölkələrlə əvəz etmişdir.

Böyük Dördlük və Böyük Beşlik ölkələri

2000-ci ildən etibarən Avropa Yayım İttifaqının qərarına əsasən Almaniya, Böyük Britaniya, Fransa və İspaniya hər il Avroviziyada birbaşa finalda iştirak etmək hüququ qazanırlar. Bu ölkələrə müsabiqədə eyni zamanda "Böyük Dördlük" ölkələri də deyilirdi. Böyük Dördlük ölkələrinə birbaşa finalda iştirak hüququnun verilməsinə əsas səbəb isə dörd ölkənin müsabiqənin əsas maliyyə dəstəkçiləri olmaları və eyni zamanda müsabiqəyə ən çox reytinq qazandıran ölkələr olmalarıdır. 14 illik fasilədən sonra 2011-ci ildə Avroviziyaya geri dönən İtaliya da AYİ-nin qərarına əsasən Böyük Dördlük ölkələrinə qoşulmuşdur və həmin ildən etibarən Böyük Dördlük statusu "Böyük Beşlik" ilə əvəz olunmuşdur. 2000-ci ildən bəri sözü gedən beş ölkədən yalnız Almaniya 2010-ci ildə "Satellite" mahnısı ilə müsabiqədə qələbə qazanmışdır.

Avropa Yayım İttifaqı Avroviziyada iştirak etmək istəyən ölkələrin çoxluğunu və müsabiqənin yayım vaxtının 25-dən artıq ölkənin iştirakına şərait yaratmadığını nəzərə alaraq 1993-cü ildən 2004-cü ilə kimi hər il müsabiqədə son beşlikdə qərarlaşan ölkələri növbəti il müsabiqədən uzaqlaşdıraraq, digər iştirak etmək istəyən ölkələrlə əvəz etmişdir. Lakin bu qayda həmin illərdə bir çox ölkələrin narazıçılığına səbəb olurdu. Xoşagəlməz vəziyyətin qarşısını almaq üçün müsabiqənin təşkilat komitəsi 2004-cü ildə yeni ideya irəli sürmüşdür. Belə ki, Avroviziyada iştirak etmək istəyən ölkələrin çoxluğu baxımından müsabiqənin il ərzində yalnız bir gün deyil, iki gün keçirilməsinə qərar verilmişdir. Müsabiqənin ilk günündə ölkələrin final uğrunda mübarizə apardığı yarımfinal mərhələsi və ikinci günündə isə final gecəsi təşkil olunurdu. Qaydalara əsasən yarımfinalda ən çox səs toplayan on ölkə finala vəsiqə qazanırdı. Finalda isə ilk onluqda qərarlaşan ölkələr və eyni zamanda Böyük Dördlük ölkələri növbəti müsabiqənin finalında birbaşa iştirak hüququ əldə edirdi.

2008-ci ildə isə AYİ müsabiqədə iştirakda maraqlı olan ölkələrin sayının daha da artmasını nəzərə alaraq, müsabiqədə iki yarımfinal mərhələsinin tətbiq olunacağını elan etmişdir. 2008-ci ildən etibarən müsabiqədə ölkələrin ötən il qazandıqları uğurdan asılı olmayaraq hər bir ölkə yarımfinal mərhələlərində iştirak etməli idi. Yalnız Böyük Dördlük ölkələrinin (Almaniya, Böyük Britaniya, Fransa və İspaniya, daha sonra isə İtaliya) birbaşa finalda iştirak hüququ saxlanılmışdır.

Yarımfinal qaydalarına əsasən ölkələr yalnız öz iştirak etdikləri yarımfinal mərhələsində səs verə bilərlər. Hər iki yarımfinalın səsverməsində ən çox səs toplayan on ölkə Avroviziya finalına vəsiqə qazanmış olur. Finalda isə müsabiqədə iştirak edən bütün ölkələrə səsvermədə iştirak hüququ tanınır. Avroviziyada iştirak etdikləri illər ərzində hər il yarımfinalları uğurla adlayan ölkələr Ukrayna və Avstraliyadır.

Qalib ölkələr

Avroviziyanın qalibi olmaqda İrlandiya və İsveçin rekordunu hələ heç bir ölkə təkrarlaya bilməyib. Belə ki, İrlandiya müsabiqədə beş ildə dörd dəfə (1992, 1993, 1994 və 1996), ümumilikdə isə yeddi dəfə qələbə qazanıb. İsveç də müsabiqədə ən çox qələbə qazanan ölkədir. Skandinaviya ölkəsi 63 illik müsabiqədə yeddi dəfə (1974, 1984, 1991, 1999, 2012, 2015 və 2023-cü illərdə) qalibiyyət əldə edib. Böyük Britaniya, Fransa, Niderland və Lüksemburq Avroviziyada beş dəfə, İsrail isə dörd dəfə qələbə qazanıb. Danimarka, Ukrayna, İtaliya və Norveç üç dəfə, Almaniya, Avstriya, İspaniya və İsveçrə isə iki dəfə Avroviziyada qalibiyyət əldə ediblər. İlk müsabiqədə qələbə qazanan ölkə İsveçrə olmuşdur.

Böyük Britaniya Avroviziyada ən çox ikinci yer qazanan ölkədir. Belə ki, ölkə müsabiqə tarixində 16 dəfə ikinci yerdə qərarlaşmışdır. Almaniya, Fransa, İrlandiya, İspaniya və Rusiya isə müsabiqədə dörd dəfə ikinci yer qazanmışdır. Norveç Avroviziyada 11 dəfə sonuncu yerdə qərarlaşaraq müsabiqənin əsas anti-rekorduna sahib olan ölkədir.

21-ci əsrin əvvəllərində Avroviziyada heç vaxt qalib gəlməyən yeni və eyni zamanda uzun müddət müsabiqədə iştirak edən ölkələr qalib gəlmişdirlər. 2001-ci ildə Estoniya müsabiqədə qalib gəlmiş və Avroviziyada qalib gələn ilk keçmiş Sovet Respublikası olaraq tarixə düşmüşdür. 28 illik iştirakdan sonra Türkiyə ilk dəfə 2003-cü ildə Avroviziyada qələbə qazanmışdır. 31 illik iştirakdan sonra Yunanıstan ilk dəfə 2005-ci ildə müsabiqədə qalibiyyət əldə etmişdir. 45 illik iştirakdan sonra isə Finlandiya ilk dəfə 2006-cı ildə müsabiqədə qalibiyyət əldə etmişdir.

Serbiya müsabiqədə elə ilk iştirakında, 2007-ci ildə serb dilində səslənən ballada ("Molitva") ilə qalibiyyət əldə etmişdir. Ukrayna 2004-cü ildə müsabiqədə ikinci iştirakında, Latviya 2002-ci ildə müsabiqədə üçüncü iştirakında, Azərbaycan isə 2011-ci ildə müsabiqədə dördüncü iştirakında ilk Avroviziya qələbəsini qazanmışdır.

Avroviziyaya ilk dəfə qoşulduqları vaxtdan 53 il sonra Portuqaliya 2017-ci ildə portuqal dilində səslənən mahnı ilə ilk dəfə müsabiqədə qələbə qazanmışdır.

2009-cu ildən etibarən 50% telesəsvermə, 50% peşəkar münsif səsverməsinin tətbiq edildiyi müsabiqədə cəmi 3 dəfə izləyici və münsif nəticələrində fərqli qaliblər olmuşdur. Belə ki, Avroviziya 2011-in qalibi Azərbaycan xalq səsverməsində birinci yeri qazansa da, münsif səsverməsində ikinci yerdə qərarlaşmışdır. Avroviziya 2015-in qalibi İsveç münsif səsverməsində birinci olsa da, xalq səsverməsində üçüncü yerdə qərarlaşmışdır. Avroviziya 2016-da qalib gələn Ukrayna əslində nə xalq səsverməsində, nə də münsif səsverməsində qalib gəlməmişdir. Ukrayna yalnız iki səsvermənin toplamında ən çox səs toplamış ölkə olaraq müsabiqənin qalibi elan edilmişdir. Həmin müsabiqədə xalq səsverməsinin qalibi Rusiya, münsif səsverməsinin qalibi isə Avstraliya olmuşdur. Ukrayna hər iki səsvermədə ikinci yerdə qərarlaşmışdır.

Qələbə sayı	Ölkə	İl(lər)
7	İrlandiya	1970, 1980, 1987, 1992, 1993, 1994, 1996
7	İsveç	1974, 1984, 1991, 1999, 2012, 2015, 2023
5	Fransa	1958, 1960, 1962, 1969, 1977
	Böyük Britaniya	1967, 1969, 1976, 1981, 1997
	Lüksemburq	1961, 1965, 1972, 1973, 1983
	Niderland	1957, 1959, 1969, 1975, 2019
4	İsrail	1978, 1979, 1998, 2018
3	İtaliya	1964, 1990, 2021
	Ukrayna	2004, 2016, 2022
	Danimarka	1963, 2000, 2013
	Norveç	1985, 1995, 2009
	İsveçrə	1956, 1988, 2024
2	Avstriya	1966, 2014
	İspaniya	1968, 1969
	Almaniya	1982, 2010
1	Monako	1971
	Belçika	1986
	Yuqoslaviya	1989
	Estoniya	2001
	Latviya	2002
	Türkiyə	2003
	Yunanıstan	2005
	Finlandiya	2006
	Serbiya	2007
	Rusiya	2008
	Azərbaycan	2011
	Portuqaliya	2017

Müsabiqədə iştirak edən ölkələrdən Albaniya, Andorra, Avstraliya, Belarus, Bolqarıstan, Bosniya və Herseqovina, Çexiya, Ermənistan, Gürcüstan, İslandiya, Kipr, Litva, Macarıstan, Malta, Moldova, Monteneqro, Polşa, Rumıniya, San-Marino, Slovakiya, Sloveniya, Şimali Makedoniya və Xorvatiya heç vaxt qalib ola bilməmişdir.

Qaliblərin siyahısı

Avroviziya 2006-nın qalibi Lordi qrupu Afina səhnəsində

Avroviziya 2007-nin qalibi Mariya Şerifoviç Helsinki səhnəsində

Avroviziya 2011-in qalibləri Eldar Qasımov və Nigar Camal

Avroviziya 2013-ün qalibi Emmili de Forest Malmö səhnəsində

Avroviziya 2014-ün qalibi Konçita Vurst Kopenhagen səhnəsində

Avroviziya 2015-in qalibi Mons Selmerlöv Vyana səhnəsində

Avroviziya 2016-nın qalibi Camala Stokholm səhnəsində

Avroviziya 2019-un qalibi Dankan Lourens Tel-Əviv səhnəsində

İl	Ölkə	Mahnı	Müğənni(lər)	Xal	İkinci ölkə	Tarix	Ev sahibi olan şəhər
1956	İsveçrə	"Refrain"	Liz Assia	Bilinmir	Bilinmir	24 may 1956	Luqano
1957	Niderland	"Net als toen"	Kori Brokken	31	Fransa	3 mart 1957	Frankfurt
1958	Fransa	""	Andre Klevyö	27	İsveçrə	12 mart 1958	Hilversum
1959	Niderland	"Een beetje"	Teddi Sxolten	21	Böyük Britaniya	11 mart 1959	Kann
1960	Fransa	"Tom Pillibi"	Jaklin Boye	32	Böyük Britaniya	25 mart 1960	London
1961	Lüksemburq	"Nous les amoureux"	Jan-Klod Paskal	31	Böyük Britaniya	18 mart 1961	Kann
1962	Fransa	"Un premier amour"	İzabel Obre	26	Monako	18 mart 1962	Lüksemburq
1963	Danimarka	"Dansevise"	Qrete və Yörqen İnqmann	42	İsveçrə	23 mart 1963	London
1964	İtaliya	""	Cilyola Çinkvetti	49	Böyük Britaniya	21 mart 1964	Kopenhagen
1965	Lüksemburq	"Poupée de cire, poupée de son"	Frans Qall	32	Böyük Britaniya	20 mart 1965	Neapol
1966	Avstriya	"Merci Chérie"	Udo Yürqens	31	İsveç	5 mart 1966	Lüksemburq
1967	Böyük Britaniya	"Puppet on a String"	Sendi Şou	47	İrlandiya	8 aprel 1967	Vyana
1968	İspaniya	"La, la, la"	Massiel	27	Böyük Britaniya	6 aprel 1968	London
1969	İspaniya	"Vivo Cantando"	Salome	18	Olmayıb	29 mart 1969	Madrid
	Böyük Britaniya	"Boom Bang-a-Bang"	Lulu
	Niderland	"De troubadour"	Lenni Kür
	Fransa	"Un jour, un enfant"	Frida Bokkara
1970	İrlandiya	""	Dana	32	Böyük Britaniya	21 mart 1970	Amsterdam
1971	Monako	"Un banc, un arbre, une rue"	Severin	128	İspaniya	3 aprel 1971	Dublin
1972	Lüksemburq	"Après toi"	Viki Leandros	128	Böyük Britaniya	25 mart 1972	Edinburq
1973	Lüksemburq	"Tu te reconnaîtras"	Ann-Mari David	129	İspaniya	7 aprel 1973	Lüksemburq
1974	İsveç	"Waterloo"	ABBA	24	İtaliya	6 aprel 1974	Brayton
1975	Niderland	"Ding-A-Dong"	Teach-In	152	Böyük Britaniya	22 mart 1975	Stokholm
1976	Böyük Britaniya	"Save Your Kisses for Me"	Brotherhood of Man	164	Fransa	3 aprel 1976	Haaqa
1977	Fransa	"L'oiseau et l'enfant"	Mari Miriam	136	Böyük Britaniya	7 may 1977	London
1978	İsrail	"A-Ba-Ni-Bi"	İzhar Koen və Alphabeta	157	Belçika	22 aprel 1978	Paris
1979	İsrail	"Hallelujah"	Qali Atari və Milk&Honey	125	İspaniya	31 mart 1979	Qüds
1980	İrlandiya	"What's Another Year?"	Conni Loqan	143	Almaniya	19 aprel 1980	Haaqa
1981	Böyük Britaniya	"Making Your Mind Up"	Bucks Fizz	136	Almaniya	4 aprel 1981	Dublin
1982	Almaniya	"Ein bißchen Frieden"	Nikol	161	İsrail	24 aprel 1982	Harroqeyt
1983	Lüksemburq	"Si la vie est cadeau"	Korinn Erme	142	İsrail	23 aprel 1983	Münhen
1984	İsveç	"Diggi-Loo Diggi-Ley"	Herreys	145	İrlandiya	5 may 1984	Lüksemburq
1985	Norveç	"La det swinge"	Bobbysocks	123	Almaniya	4 may 1985	Göteborq
1986	Belçika	"J'aime la vie"	Sandra Kim	176	İsveçrə	3 may 1986	Bergen
1987	İrlandiya	"Hold Me Now"	Conni Loqan	172	Almaniya	9 may 1987	Brüssel
1988	İsveçrə	""	Selin Dion	137	Böyük Britaniya	30 aprel 1988	Dublin
1989	Yuqoslaviya	""	Riva	137	Böyük Britaniya	6 may 1989	Lozanna
1990	İtaliya	"Insieme: 1992"	Toto Kutunyo	149	İrlandiya/ Fransa	5 may 1990	Zaqreb
1991	İsveç	"Fångad av en stormvind"	Karola	146	Fransa	4 may 1991	Roma
1992	İrlandiya	""	Linda Martin	155	Böyük Britaniya	9 may 1992	Malmö
1993	İrlandiya	"In Your Eyes"	Niv Kavana	187	Böyük Britaniya	15 may 1993	Millstrit
1994	İrlandiya	"Rock 'n' Roll Kids"	Pol Harrinqton və Çarli MakQettiqan	226	Polşa	30 aprel 1994	Dublin
1995	Norveç	"Nocturne"	Secret Garden	148	İspaniya	13 may 1995	Dublin
1996	İrlandiya	"The Voice"	Eymar Kuinn	162	Norveç	18 may 1996	Oslo
1997	Böyük Britaniya	"Love Shine a Light"	Katrina & the Waves	227	İrlandiya	3 may 1997	Dublin
1998	İsrail	""	Dana International	172	Böyük Britaniya	9 may 1998	Birminhem
1999	İsveç	""	Şarlotta Nilsson	163	İslandiya	29 may 1999	Qüds
2000	Danimarka	""	Olsen Brothers	195	Rusiya	13 may 2000	Stokholm
2001	Estoniya	"Everybody"	Tanel Padar, Deyv Benton və 2XL	198	Danimarka	12 may 2001	Kopenhagen
2002	Latviya	"I Wanna"	Marie N	176	Malta	25 may 2002	Tallin
2003	Türkiyə	""	Sertab Erener	167	Belçika	24 may 2003	Riqa
2004	Ukrayna	""	Ruslana	280	Serbiya və Monteneqro	15 may 2004	İstanbul
2005	Yunanıstan	"My Number One"	Elena Paparizu	230	Malta	21 may 2005	Kiyev
2006	Finlandiya	"Hard Rock Hallelujah"	Lordi	292	Rusiya	20 may 2006	Afina
2007	Serbiya	"Molitva"	Mariya Şerifoviç	268	Ukrayna	12 may 2007	Helsinki
2008	Rusiya	"Believe"	Dima Bilan	272	Ukrayna	24 may 2008	Belqrad
2009	Norveç	"Fairytale"	Aleksandr Rıbak	387	İslandiya	16 may 2009	Moskva
2010	Almaniya	"Satellite"	Lena	246	Türkiyə	29 may 2010	Oslo
2011	Azərbaycan	"Running Scared"	Eldar Qasımov və Nigar Camal	221	İtaliya	14 may 2011	Düsseldorf
2012	İsveç	"Euphoria"	Lorin	372	Rusiya	26 may 2012	Bakı
2013	Danimarka	"Only Teardrops"	Emmili de Forest	281	Azərbaycan	18 may 2013	Malmö
2014	Avstriya	"Rise Like a Phoenix"	Konçita Vurst	290	Niderland	10 may 2014	Kopenhagen
2015	İsveç	""	Mons Selmerlöv	365	Rusiya	23 may 2015	Vyana
2016	Ukrayna	"1944"	Camala	534	Avstraliya	14 may 2016	Stokholm
2017	Portuqaliya	"Amar Pelos Dois"	Salvador Sobral	758	Bolqarıstan	13 may 2017	Kiyev
2018	İsrail	"Toy"	Netta Barzilay	529	Kipr	12 may 2018	Lissabon
2019	Niderland	"Arcade"	Dankan Lourens	498	İtaliya	18 may 2019	Təl-Əviv
2021	İtaliya	"Zitti e buoni"	Maneskin	524	Fransa	22 may 2021	Rotterdam
2022	Ukrayna	""	Kaluş Orkestrı	631	Böyük Britaniya	14 may 2022	Turin
2023	İsveç	""	Lorin	583	Finlandiya	13 may 2022	Liverpul
2024	İsveçrə	""		591	Xorvatiya	11 may 2022	Malmö

Tənqid və qalmaqallar

Avroviziya müsabiqənin həm musiqi, həm də siyasi tərkibinə görə dəfələrlə tənqidə məruz qalmışdır. Məsələn, müsabiqədə müxtəlif illərdə səsvermə zamanı müəyyən qonşu ölkələrin bir-birinə səs verdikləri məqamlarda zalda əyləşən insanlar səsverməyə etiraz etmişdirlər. Müsabiqədə əsasən narazıçılıqlara səbəb olan ölkə isə Rusiyadır. 2014 və 2015-ci illərdə Rusiya təmsilçiləri müsabiqədə səhnə aldıqları zaman ifa boyunca zalda əyləşən kütlənin böyük hissəsi ölkəyə qarşı olan etiraz səslərini yüksəltmişdirlər. Avropalıların Rusiyaya qarşı bu ani aqressiyasının səbəbinin Rusiyanın Krıma hərbi müdaxilə etməsindən və ölkədə LGBT hüquqlarının pis vəziyyətdə olmasından yarandığı düşünülür.

Musiqi üslubu və təqdimat

Formal olaraq Avroviziyada təqdim olunan musiqiyə heç bir məhdudiyyət qoyulmur, janrın seçimi ifaçının və seçim prosesinə cavabdeh təşkilatın öhdəsinə buraxılır. Yeganə məhdudiyyət mahnı mətnlərində senzuradan kənar ifadələrin, siyasi çağırışların və buna bənzər ifadə tərzlərinin olmasına qoyulur.

Lakin ötən illər ərzində müsabiqənin məxsusi "formatı" yaranıb və səs verən tamaşaçıların zövqü nəzərə alınaraq bu formata uyğun mahnılar yazılır. Əksər hallarda iştirakçılar pop musiqisi, balladalar, ya da xalq musiqisinin estrada tərzində olan işləməsini ifa edirlər. Lakin bu "format" ilk dəfə 2006-cı ildə Finlandiya təmsilçiləri olan Lordi ağır metal rok qrupunun müsabiqədə qalibiyyət qazanmaları ilə aradan qalxmışdır. Son illərdə isə artıq müsabiqədə tamam fərqli musiqi janrlarından, habelə, caz, elektronika, country və s. istifadə edilir.

İstinadlar

1. "Eurovision recognised by Guinness World Records as the largest in the world and the longest-running annual TV music competition (international)". Ginnesin Rekordlar Kitabı. 2016-05-05 tarixində . İstifadə tarixi: 2017-10-23.
2. "Live Webcast". Avropa Yayım İttifaqı. 25 May 2006 tarixində . İstifadə tarixi: 25 may 2006.
3. "Australia to return to the Eurovision Song Contest!". Avropa Yayım İttifaqı. 11 noyabr 2015. 2016-12-20 tarixində . İstifadə tarixi: 2017-10-23.
4. Webcasting and the Eurovision Song Contest 2008-05-28 at the Wayback Machine, AYİ, 21 avqust 2006
5. Eurovision’s Golden Jubilee 2004-08-11 at the Wayback Machine, AYİ, 1 dekabr 2004
6. , eurovision.tv, 26 may 2006
7. . 2008-05-28 tarixində orijinalından arxivləşdirilib. İstifadə tarixi: 2008-06-14.
8. "Australia to make Eurovision Song Contest return in 2016". ebu.ch. Avropa Yayım İttifaqı. 17 noyabr 2015. 2016-03-06 tarixində . İstifadə tarixi: 3 mart 2016.
9. "Interviews 2008". Avropa Yayım İttifaqı. 2008. 2008-06-18 tarixində . İstifadə tarixi: 21 iyun 2009. (#apostrophe_markup)
10. "The EuroClub: Official party venue opened its doors". AYİ. 2009-05-08 tarixində . İstifadə tarixi: 18 iyul 2009.
11. "Biggest change to Eurovision Song Contest voting since 1975". 18 fevral 2016. 2016-03-14 tarixində . İstifadə tarixi: 20 mart 2016.
12. "Download the official Eurovision app". Eurovision.tv. 3 noyabr 2014. 2014-11-03 tarixində . İstifadə tarixi: 2017-10-26.
13. "Biggest change to Eurovision Song Contest voting since 1975". eurovision.tv. 18 fevral 2016. 2016-03-14 tarixində . İstifadə tarixi: 2017-10-26.
14. "Eurovision Song Contest 1970". AYİ. 2010-12-31 tarixində . İstifadə tarixi: 23 iyul 2009.
15. "Soraya, al borde de la descalificación en Eurovisión" (İspanca). ABC. 15 may 2009. 17 May 2009 tarixində . İstifadə tarixi: 27 October 2017.
16. "Eurovision Song Contest 1957". AYİ. 2016-09-13 tarixində . İstifadə tarixi: 19 iyul 2009.
17. "Eurovision Song Contest 1978". AYİ. 2017-02-27 tarixində . İstifadə tarixi: 18 iyul 2009.
18. "Gürcüstan Avroviziya mahnı müsabiqəsində iştirak etməyəcək" 2023-06-28 at the Wayback Machine tarixi:2009.03.12
19. "Ukraine bans Russia's Eurovision entrant over Crimea tour". The Guardian. 2017-07-18 tarixində . İstifadə tarixi: 22 mart 2017.
20. "Russia strikes provocative note for Eurovision in Ukraine". The Guardian. 2017-03-23 tarixində . İstifadə tarixi: 22 mart 2017.
21. "43 nations on 2011 participants list". Eurovision.tv. 31 dekabr 2010. 2017-02-27 tarixində . İstifadə tarixi: 2017-10-28. (#apostrophe_markup)
22. "Eurovision Song Contest 2004 Semi-final". AYİ. 2014-07-17 tarixində . İstifadə tarixi: 22 iyul 2009.
23. "Eurovision Song Contest – Two Semi-finals in 2008" (PDF). AYİ. 1 oktyabr 2007. 2011-06-07 tarixində (PDF). İstifadə tarixi: 2017-10-28.
24. . B92. 22 November 2007 tarixində orijinalından arxivləşdirilib. İstifadə tarixi: 15 may 2011.
25. "By year". Eurovision.tv. 2017-01-29 tarixində . İstifadə tarixi: 2017-10-28.
26. "Politics 'not Eurovision factor'". BBC News Online. 9 may 2007. 31 March 2008 tarixində . İstifadə tarixi: 29 October 2017.
27. "Eurovision 2014: the booing of Russia was a disgrace". Spectator Blogs. 2015-05-04 tarixində . İstifadə tarixi: 2017-10-29.

Xarici keçidlər

Vikianbarda Avroviziya Mahnı Müsabiqəsi ilə əlaqəli mediafayllar var.

• Eurovision.tv