Yusif Ağayev (prokuror)

Vikipediyada bu ad-soyadlı digər şəxslər haqqında da məqalələr var; bax: Yusif Ağayev.

Yusif Şükür oğlu Ağayev (1963, Bakı) — Azərbaycan siyasətçisi, hərbçisi, hüquqşünası, hərbi tarixçisi. O, Azərbaycan Respublikası Baş Prokurorluğunun Dağlıq Qarabağ üzrə mühüm işlər müstəntiqi (1991–1992), Qarabağ Qarnizonunun hərbi prokuroru (1992–1996), Tərtər rayonunun prokuroru (1996–2003) vəzifələrində çalışmışdır.

Yusif Ağayev
Tərtər rayonunun prokuroru
1996 – 2003
Prezident	Heydər Əliyev
Qarabağ Qarnizonunun hərbi prokuroru
1992 – 1996
Prezident	Əbülfəz Elçibəy Heydər Əliyev
Dağlıq Qarabağ üzrə mühüm işlər müstəntiqi
1991 – 1992
Prezident	İsa Qəmbər
Şəxsi məlumatlar
Doğum tarixi	1963
Doğum yeri	Bakı, Azərbaycan SSR, SSRİ
Milliyyəti	azərbaycanlı
Fəaliyyəti	siyasətçi, hərbi lider^[d], vəkil, tarixçi, prokuror
Hərbi xidmət
Döyüşlər	Kərkicahanın işğalı^[d], Şuşanın işğalı, Ağdam uğrunda döyüş

Erkən illəri

Yusif Şükür oğlu Ağayev 1963-cü ildə Azərbaycan SSR-nin paytaxtı Bakıda anadan olmuşdur. O, əslən Füzuli rayonundandır. Ağayev 1985-ci ildə Qazaxıstan Dövlət Universitetinin hüquq fakültəsini bitirmişdir. O, 1985–1987-ci illərdə Qazaxıstanın Quryev vilayətində vəkil, 1987–1991-ci illərdə həmin vilayətdə prokurorluğun istintaq idarəsinin prokuroru işləmişdir.

Birinci Qarabağ müharibəsi

Sovet İttifaqı dağılandan sonra Azərbaycanın müdafiə naziri Rəhim Qazıyev xaricdəki bütün azərbaycanlı əsgər və zabitləri Azərbaycana qayıtmağa çağırmışdır. Ağayev də Azərbaycana qayıtmış, 1991-ci ildə Azərbaycan Respublikası Baş Prokurorluğunun Dağlıq Qarabağ üzrə mühüm işlər müstəntiqi təyin edilmişdir. Rzayevin qərargahı 1991-ci ilin payızına qədər Xankəndində, 1992-ci ilin mayına qədər Şuşada olmuş və nəhayət Ağdama köçürülmüşdür. O, erməni silahlı birləşmələri ilə yanaşı, azərbaycanlı fərarilərlə məşğul olurdu.

Azərbaycanlı komandir Yaqub Rzayev dövlətə xəyanətdə və Ermənistan tərəfi ilə əməkdaşlıqda şübhəli bilinirdi. İddialara görə, o, erməni komandirlərlə razılıq əldə etmiş, əsgərlərini döyüş bölgəsindən geri çəkərək həmin komandirlərin azsaylı itki ilə qələbə çalmasına, öz reputasiyalarının artmalarına səbəb olmuşdur. Rzayev aldadılaraq Bakıya gətirilmiş və Yusif Ağayev tərəfindən həbs edilmişdir. Ağayev Rzayevi həbs etdikdən sonra əmrində olan polis əməkdaşlarına Rzayevin qərargahını yoxlamağı tapşırmışdır. Axtarış zamanı onlar bir neçə soyuducu tankı açmış, onların içərisində buzda saxlanılan gənc azərbaycanlı əsgərin cəsədini aşkar etmişdir.

Yusif Ağayev 1992–1996-cı illərdə Qarabağ Qarnizonunun hərbi prokuroru vəzifəsində çalışmışdır. O, 1992-ci ildə Füzulidə yaralanmış, 1993-cü ilin yayında Ağdam uğrunda döyüş zamanı qol və ayaqlarından qəlpə yarası almışdır.

Sonrakı illər

Müharibədən sonra Ağayev, 1996–2003-cü illərdə Tərtər rayonunun prokuroru, 2006–2009-cu illərdə isə Bakıda beynəlxalq təşkilatların birində baş hüquqşünas işləmişdir.

Yusif Ağayev 2020-ci ilin fevralında keçirilən növbədənkənar parlament seçkilərində 84 saylı Füzuli seçki dairəsindən namizəd olmuşdur. O, yanvar ayında digər namizədlərlə birlikdə Azərbaycan Prezidenti İlham Əliyevə müraciət edərək yerli məmurlar tərəfindən hədə-qorxuya məruz qaldığını bildirmişdir. Hər halda, Ağayev 1,019 səs toplayaraq üçüncü yerdə qərarlaşmışdır. O, Mərkəzi Seçki Komissiyasına nəticələrin ləğv olunması üçün şikayət yazmış, lakin bu müraciət qəbul edilməmişdir.

Ağayev həmçinin, hərb tarixçisidir. O, Azərbaycanın hərb tarixi üzrə dörd kitabın, çoxsaylı məqalələrin müəllifi və həmmüəllifidir. Ağayev türk, qazax, rus və ingilis dillərini bilir.

Mənbə

İstinadlar

1. Novator, 2020
2. Qolts, 2015. səh. 149
3. Qaraçənli, 2021
4. Qolts, 2015. səh. 290–291
5. Qolts, 2015. səh. 394
6. Qolts, 2015. səh. 152–153
7. Azinforum, 2020
8. MSK, 2020
9. Pənahov, 2020
10. İctimai Xəbər, 2020

Ədəbiyyat

• Qolts, Tomas. Azerbaijan Diary: A Rogue Reporter's Adventures in an Oil-rich, War-torn, Post-Soviet Republic (ingilis) (1st Edition). Routledge. 1998. ISBN .
• Qaraçənli, Azər. "Vətən təyinatlı" (az.). 6 noyabr 2021. 2022-01-26 tarixində arxivləşdirilib. İstifadə tarixi: 26 yanvar 2022.
• "84 SAYLI FÜZULİ SEÇKİ DAİRƏSİ". Mərkəzi Seçki Komissiyası (az.). 9 fevral 2020. 2022-01-26 tarixində arxivləşdirilib. İstifadə tarixi: 26 yanvar 2022.
• Pənahov, Məzahir. "2020-ci il fevralın 9-da keçirilmiş Azərbaycan Respublikasının Milli Məclisinə seçkilərdə Mərkəzi Seçki Komissiyasına daxil olmuş 21 fevral 2020-ci il tarixli 365 saylı müraciətə baxılması barədə Azərbaycan Respublikası Mərkəzi Seçki Komissiyasının qərarı" (PDF). Mərkəzi Seçki Komissiyası (az.). 21 fevral 2020. 2022-01-26 tarixində arxivləşdirilib (PDF). İstifadə tarixi: 26 yanvar 2022.
• "Qəlpəli namizəd: döyüşdə və yaralı – VİDEO, FOTO". Novator (az.). 27 yanvar 2020. 2022-01-26 tarixində arxivləşdirilib. İstifadə tarixi: 26 yanvar 2022.
• "84 saylı DAİRƏDƏ 5 NAMİZƏD BİRLƏŞDİ: "Məmurlar Vüqar Bayramova görə hamıya hədə-qorxu gəlir" – Prezidentə şikayət + FOTO". Azinforum (az.). 29 yanvar 2020. 2022-01-26 tarixində arxivləşdirilib. İstifadə tarixi: 26 yanvar 2022.
• "Yusif Ağayevin seçicilərlə görüşü – Video". İctimai Xəbər (az.). 7 fevral 2020. 2022-01-26 tarixində arxivləşdirilib. İstifadə tarixi: 26 yanvar 2022.