Şarlotta Gensbur

Şarlotta Lüsi Gensbur (ing. Charlotte Lucy Gainsbourg; 21 iyul 1971, London, İngiltərə, Böyük Britaniya) — Böyük Britaniya - Fransa aktrisası və müğənnisi.

Şarlotta Gensbur
ing. Charlotte Gainsbourg
Şarlotta Gensbur 2010-cu ildə
Doğum adı	Şarlotta Lüsi Gensbur
Digər adı	Şarlotta Gensburq
Doğum tarixi	21 iyul 1971(52 yaş)
Doğum yeri	London, İngiltərə, Birləşmiş Krallıq
Vətəndaşlığı	Birləşmiş Krallıq  Fransa
Atası	Serj Gensbur
Anası	Ceyn Birkin
Fəaliyyəti	aktrisa müğənni
Fəaliyyət illəri	1984-bu günə qədər
İstiqamət	kino musiqi
Mükafatları	Ən yaxşı qadın roluna görə Kann kinofestivalının mükafatı (2009)
IMDb	ID0001250
charlottegainsbourg.fr
Vikianbarda əlaqəli mediafayllar

Həyatı

Şarlotta Gensbur 21 iyul 1971-ci ildə Londonda anadan olmuşdur. O, müğənni, rejissor və aktyor Serj Gensbur və müğənni-aktrisa olan Ceyn Birkinin ailəsində doğulmuşdu. İsveçrədəki Beau Soleil özəl məktəbində təhsil almışdır.

Yaradıcılığı

Kino

Şarlotta Gensbur aktyorluq fəaliyyətinə 1984-cü ildə 13 yaşında çəkildiyi "Sözlər və musiqi" filmilə başlayıb. Bu filmdə o, Katrin Denövün qəhrəmanının qızını ifa edirdi. Karyerasına yeni başlayan aktrisa artıq 2 ildən sonra Klod Millerin "Ədəbsiz qız" filmindəki roluna görə "Sezar" mükafatına layiq görüldü. Şarlotta "Sement bağ" filmindən sonra 1990-cı illərdə beynəlxalq uğur əldə etdi. Bu film valideynlərinin ölümündən sonra bacı və qardaşın dramatik hekayəsindən bəhs edirdi.

2000-ci ildə Gensbur "Milad piroqu" filmindəki roluna görə artıq ən yaxşı aktrisa nominasiyasında "Sezar" mükafatına layiq görülür. Bundan sonra iki dəfə bu mükafata namizəd olmuşdur. 2001-ci ildə Şarlotta Gensbur Kann kinofestivalının münsiflər heyətinin üzvü olmuşdur. 2006-cı ildə tamaşaçılar onu "Lemminq" psixoloji dramında Benedikta rolunda izlədilər. Bundan başqa 2006-cı ilin payızında Mişel Qondrinin uzun müddət gözlənilən "Yuxu elmi" filmi dünya ekranlarına çıxır. Bu filmdə Gensbur Meksika aktyoru Qael Qarsiya Bernalla birlikdə çəkilmişdi.

Musiqi

Şarlotta Gensbur müğənni kimi də fəaliyyət göstərir. Onun vokal debütü 1983-cü ildə atası ilə birgə ifa etdiyi Lemon Incest dueti olur. Bundan sonra Gensbur öz iştirakı ilə çəkilən bir neçə filmə mahnı yazmışdır. Bu mahnıları "Əbədi Şarlotta", "Sevgi və s.", "Biri gedir, o biri qalır" filmlərində eşitmək olar. Onun hətta bir neçə solo albomu da işıq üzü görmüşdür: Charlotte for Ever (1986), 5:55 (2006), IRM (2009) və Stage Whisper (2012).

Ekranda özünə baxmağı və səsinə qulaq asmağı sevməsə də, kino və musiqi sahəsində bir çox nailiyyətləri var.

Şəxsi həyatı

1990-cı illərdən etibarən Şarlotta aktyor və rejissor İvan Attalla vətəndaş nikahındadır. Cütlüyün Ben Attal, Elis Attal və Co Attal adlı üç övladı var. Onlar ailəvi Parisdə yaşayırlar.

Səhhəti ilə bağlı problemlər

Aktrisa 2007-ci ilin yayında ABŞ-da beyindaxili qanaxmaya məruz qalmışdır. Həmin ilin 5 sentyabrında o, Paris xəstəxanalarının birində uğurlu beyin əməliyyatı keçirmişdir.

Filmoqrafiya

1. Sözlər və musiqi (1984) / Paroles et Musique
2. Ədəbsiz qız (1985) / L’Effrontée
3. Əbədi Şarlotta (1986) / Charlotte For Ever
4. Təşəkkür, həyat (1991) / Merci la vie
5. Sement bağ (1992) / The Cement Garden
6. Aşiq (1992) / Amoureuse
7. Ceyn Eyr (film, 1996) / Jane Eyre
8. Sevgi və s. (1996) / Love etc.
9. Milad piroqu (1999) / La Bûche
10. Səfillər (2000) / Les misérables
11. Feliks və Lola (2001) / Felix et lola
12. Mənim arvadım aktrisadır (2001) / Ma femme est une actrice
13. 21 qram (2003) / 21 Grams
14. Lemminq (2005) / Lemming
15. Biri gedir, o biri qalır (2005) / L’un reste, l’autre part
16. Yuxu elmi (2006) / La Science des Rêves
17. Subay qalaraq necə evlənməli? (2006) / Prête-moi ta main
18. Mən orada yoxam (2007) / I’m Not There
19. Antixrist (film, 2009) / Antichrist
20. Ağac (2010) / The Tree
21. Melanxoliya (2011) / Melancholia
22. Narahat etməyin (2012) / Do Not Disturb
23. Nimfoman (2013) / Nymphomaniac
24. Ceki qadınlar məmləkətində (2014) / Jacky au royaume des filles
25. Samba (2014) / Samba
26. Hər şey yaxşı olacaq (2015) / Every Thing Will Be Fine
27. Müstəqillik günü: Dirçəliş (2016) / Independence Day: Resurgence

Diskoqrafiya

• Charlotte for Ever (1986)
• 5:55 (2006)
• IRM (2009)
• Stage Whisper (2012)

İstinadlar

1. "LES GENS DU CINEMA". 2011-07-13 tarixində . İstifadə tarixi: 2013-09-22.
2. "Прекрасно-самобытная и разносторонняя Шарлотта Генсбур". 2021-06-14 tarixində . İstifadə tarixi: 2013-09-24.
3. . 2013-10-13 tarixində orijinalından arxivləşdirilib. İstifadə tarixi: 2013-09-24.
4. "Interview with Charlotte Gainsbourg and Yvan Attal". 2018-10-08 tarixində . İstifadə tarixi: 2013-09-24.
5. "Charlotte Gainsbourg bio : biographie de Charlotte Gainsbourg — Gala". 2012-03-27 tarixində . İstifadə tarixi: 2013-09-24.
6. "Charlotte Gainsbourg has emergency brain surgery". 2012-01-06 tarixində . İstifadə tarixi: 2013-09-24.

Xarici keçidlər

• Şarlotta Gensbur — IMDb səhifəsi

Vikianbarda Şarlotta Gensbur ilə əlaqəli mediafayllar var.