Xanım əbdülqafar qızı Qafarova Azərbaycanın teatr və kino aktrisası müğənni Azərbaycanın əməkdar artisti 2003 Xanım Qafa

Xanım Əbdülqafar qızı Qafarova — Azərbaycanın teatr və kino aktrisası, müğənni, Azərbaycanın əməkdar artisti (2003).

Xanım Qafarova
Xanım Əbdülqafar qızı Qafarova

Doğum adı	Xanım Əbdülqafar qızı Qafarova
Doğum tarixi	9 may 1967
Doğum yeri	Kürdəxanı, Bakı, Azərbaycan SSR
Vəfat tarixi	11 iyul 2014 (47 yaşında)
Vəfat yeri	Bakı, Azərbaycan
Vəfat səbəbi	Süd vəzi xərçəngi
Dəfn yeri	Bakı
Vətəndaşlığı	SSRİ Azərbaycan
Uşağı	Gövhər
Atası	Abdulqafar Qafarov
Fəaliyyəti	aktrisa
Mükafatları	2003 Prezident Mükafatı (2012)

Həyatı

Xanım Əbdülqafar qızı Qafarova 1967-ci ildə anadan olub. Xanım Qafarova teatr və musiqi sənətlərinə erkən yaşlarından maraqlanmış, uğurlu çıxışlar edərək 1-ci, 2-ci və 3-cü Ümumittifaq xalq yaradıcılığı festivallarının laureatı olmuşdur. Bir müddət xalq artisti Lütfi Məmmədbəyovun xalq teatrında məşğul olmuş, bu zaman "Bahar suları" əsərində Turac, "Mənim nəğməkar bibim"də Nəğməkar bibi, "Kişilər"də Səmayə, "Aydın"da Gültəkin, "Oqtay Eloğlu"nda Firəngiz, "Yad qızı"nda Nazan, "Mavi Mazurka"da Böyük Bibi və başqa tamaşalarda əsas rolları oynamışdır.

1987-ci ildə İncəsənət İnstitutunun Musiqili Komediya fakültəsinə daxil olmuş, hələ ikinci kursda oxuyarkən "Tənqid-Təbliğ" teatrında işləməyə başlamışdır. Bu teatr Xanım Qafarovanın yaradıcılıq həyatında xüsusilə böyük əhəmiyyət kəsb etmiş, ona sənətin sirrlərini daha dərindən öyrədərək, gənc aktrisanı mürəkkəb xarakterli obrazları yaradıcısı kimi püxtələşdirmişdir. Burada o R. Əhmədzadənin "92 dəqiqə gülüş" tamaşasında Balaxanım, "Hələlik"də Nisəxanım, Qənirə və Qoca arvad rollarını, Vaqif Səmədoğlunun "Uca dağ başında" əsərində Şənbə xanım və süpürgəçi qadın rollarını çox uğurla ifa etmişdir. Bundan başqa "Heç cür qana bilmirəm", "Bir gün sizinlə", "Bir başqa gecə" və s. şou-konsert proqramları ilə Bakının möhtəşəm sarayları ilə yanaşı Respublikanın əksər kənd və rayonlarında maraqlı və uğurlu çıxışlar etmişdir.

1996-cı ildə Xanım Qafarova Azərbaycan Dövlət Musiqili Komediya Teatrına dəvət almışdır. Geniş yaradıcılıq imkanları, məhsuldar işgüzarlıq mühiti olan bu sənət ocağında bu istedadlı aktrisa "O olmasın bu olsun"da Gülnaz, "On min dollarlıq keyf"də Bağdagül, "Nəğməli könül"də Könül, "Hərənin öz ulduzu"nda Məleykə, "Səhnədə məhəbbət"də Röya, "Bankir adaxlı"da Məleykə, "Məhəbbət oyunun"da Qəmər, "Dəli dünya"da , "Talelər qovuşanda" əsərində Sona, "Aldın payını, çağır dayını" tamaşasında xəbərçi Xədicə, "Şeytanın yubileyi"ndə Xəyalə kimi yaddaqalan obrazlar yaradaraq, özünə minlərlə pərəstişkar qazanmışdır. O, 1997-ci ildə "Teatr sahəsində Nəsibə Zeynalova adına mükafat"a layiq görülmüşdür. 2000-ci ildə sənət sahəsindəki mesanatlıq fəaliyyətinə görə Gənclər təşkilatının fəxri diplomuna layiq görülmüşdür. 2001-ci ilin yekunlarına görə XXI əsrin ilk uğurlu müsabiqəsinin 1-ci dərəcəli Diplomu ilə (İlin Aktrisası nominasiyası üzrə) təltif edilmişdir.

Teatrın repertuarda olan bütün tamaşalarda baş və əsas rolların ifaçısı olan Xanım Qafarova 2003-cü ildə Azərbaycan Respublikasının Əməkdar artisti fəxri adına layiq görülüb.

Gözəl, güclü, məlahətli səsə malik olan Xanım Qafarova teatr fəaliyyəti ilə yanaşı müntəzəm olaraq böyük konsert salonlarında, cəbhə bölgələrində, dövlət tədbirlərində, televiziya verilişlərində və tamaşalarında çıxışlar edir, paralel olaraq müğənnilik fəaliyyəti ilə də məşğul olur. Özünəməxsus repertuarında 60-a qədər orijinal mahnı ifa edən aktrisa-müğənninin iki albomu, üç klipi tamaşaçılara təqdim olunub.

9 may 2012-ci ildə və 30 aprel 2014-cü ildə Prezident Mükafatına layiq görülmüşdür.

Süd vəzi xərçəngindən əziyyət çəkən Xanım Qafarova 11 iyul 2014-cü ildə Bakıda dünyasını dəyişmişdir. Elə həmin gün Kürdəxanı qəbiristanlığında dəfn olunmuşdur.

Filmoqrafiya

Şirbalanın məhəbbəti (film, 1991)
Kənddən gələn var
Kənddən gələn var. II hissə
Yuxu (film, 2001)
Adam ol! 2 (film, 2006) (tammetrajlı bədii film)-rol: prodüser
Bacanaqlar (film, 2009)
Qayınana (film, 2011)

İstinadlar

Nigar Məmmədli. "Xanım Qafarova: "Ana olmağı 40 il arzulamışam"" (az.). lent.az. 07.12.2008 15:00. İstifadə tarixi: 2014-04-28.^{[ölü keçid]}
Zülfiyyə Qurbanova. "Əməkdar artist süd vəzisindən əməliyyat olunub" (az.). anspress.com. 05.05.2009 20:34. İstifadə tarixi: 2014-04-28.^{[ölü keçid]}
"İncəsənət xadimlərinə Azərbaycan Respublikası Prezidentinin mükafatlarının verilməsi haqqında Azərbaycan Respublikası Prezidentinin Sərəncamı". 2018-04-07 tarixində . İstifadə tarixi: 2014-04-30.
Bu dünyada bir Xanım vardı...- Fotolar 2014-07-14 at the Wayback Machine qafqazinfo.az (az.)
Xanım Qafarova dəfn olundu- Fotolar 2014-07-14 at the Wayback Machine qafqazinfo.az (az.)

Mənbə

Xanım Qafarova - Kinotap

Xarici keçidlər

Xanım Qafarovanın vəziyyəti ağırlaşdı
İzlə

[1] Nigar Məmmədli. "Xanım Qafarova: "Ana olmağı 40 il arzulamışam"" (az.). lent.az. 07.12.2008 15:00. İstifadə tarixi: 2014-04-28.^{[ölü keçid]}

[2] Zülfiyyə Qurbanova. "Əməkdar artist süd vəzisindən əməliyyat olunub" (az.). anspress.com. 05.05.2009 20:34. İstifadə tarixi: 2014-04-28.^{[ölü keçid]}

[3] "İncəsənət xadimlərinə Azərbaycan Respublikası Prezidentinin mükafatlarının verilməsi haqqında Azərbaycan Respublikası Prezidentinin Sərəncamı". 2018-04-07 tarixində . İstifadə tarixi: 2014-04-30.

[4] Bu dünyada bir Xanım vardı...- Fotolar 2014-07-14 at the Wayback Machine qafqazinfo.az (az.)

[5] Xanım Qafarova dəfn olundu- Fotolar 2014-07-14 at the Wayback Machine qafqazinfo.az (az.)