O ekranlardakı adı ilə O ilk fəsil Endi Muskettinin rejissorluğu ilə ərsəyə gələn çeyz Palmer Keri Fukunaqa və Qeri Dobe

O (ekranlardakı adı ilə: "O: İlk fəsil") — Endi Muskettinin rejissorluğu ilə ərsəyə gələn, Çeyz Palmer, Keri Fukunaqa və Qeri Dobermanın ssenari müəllifliyi etdiyi 2017-ci ilin fövqəltəbii qorxu janrında çəkilmiş ABŞ filmi. Stiven Kinqin 1986-cı ildə qələmə aldığı eyniadlı romanının iki hissəli ekranlaşdırmasının ilk qismi olan ekran əsəri, kitabın xronoloji baxımdan birinci yarısını əhatə edir. Eyni zamanda, "O" film silsiləsinin başlanğıcı olmaqla yanaşı, Tommi Li Vollesin 1990-cı il mini-serialından sonra ikinci ekran adaptasiyasıdır. "New Line Cinema", "KatzSmith Productions", "Lin Pictures" və "Vertigo Entertainment" kimi kino şirkətlərinin istehsalı olan filmdə baş rolları Ceyden Liberer (Martell) və Bill Skarqard paylaşır.

O
ing. It

Janr	roman ekranlaşdırması^[d], qorxu filmi, fentezi filmi^[d], müəmma filmi, triller filmi
Prodüserlər	Roy Li^[d]
Ssenari müəllifləri	Keri Coci Fukunaqa^[d]
Baş rollarda	Bill Skarsqard Ceyden Martell^[d] Finn Vulfhard Cek Dilan Qreyzer
İstehsalçı	New Line Cinema
Distribütor	New Line Cinema, Warner Bros., InterCom^[d], Netflix
İlk baxış tarixi	8 sentyabr 2017, 28 sentyabr 2017, 15 sentyabr 2017, 7 sentyabr 2017, 20 sentyabr 2017
Müddət	135 dəq.
Büdcə	35.000.000 $^[…]
Gəlir	701.842.551 $, 328.874.981 $
Ölkə	ABŞ
Dil	ingilis dili
Rəng	rəngli^[d]
IMDb	ID1396484
Vikianbarda əlaqəli mediafayllar

Men ştatının uydurma Derri şəhərində cərəyan edən hadisələr mərkəzində yeddi gəncdən ibarət "Uduzanlar Klubu" dayanır. Liberer, Sofiya Lillis, Cek Dilan Qreyzer, Finn Vulfhard, Uayatt Oleff, Çouzen Cekobs və Ceremi Rey Teylor kimi gənc aktyorların canlandırdığı bu qəhrəmanlar, kanalizasiya sistemindən peyda olan, özünü Pennivayz adlı rəqs edən kloun qiyafəsində göstərən qorxunc məxluqun təqibinə məruz qalırlar. Bu mübarizə prosesində onlar öz daxili qorxuları ilə də üzləşməli olurlar.

"O" əsərinin ekranlaşdırılması 2009-cu ilin mart ayında "Warner Bros." şirkətinin təşəbbüsü ilə başlandı – əvvəlcə Devid Kayqaniç rejissor kürsüsünə dəvət olunsa da, 2012-ci ilin iyununda yerini Fukunaqaya təhvil verir. Fukunaqa 2015-ci ilin mayında layihədən uzaqlaşdıqdan sonra həmin ilin iyununda rejissorluq Muskettiyə həvalə edilib. Musketti yaradıcılıq prosesində "The Howling" (1981), "The Thing" (1982), "The Goonies" (1985), "Stand by Me" (1986), "Near Dark" (1987) kimi 80-ci illərin məşhur filmlərindən ilhamlandığını dilə gətirir, eyni zamanda Stiven Spilberqin sənətinin onun üzərində böyük təsir buraxdığını vurğulayır. Film layihəsi istehsal mərhələsində 2014-cü ilin may ayında "New Line Cinema" bölməsinə ötürülür. Əsas çəkilişlər 2016-cı il iyunun 27-də Toronto şəhərində start götürür və sentyabrın 21-də yekunlaşır. Çəkilişlər Böyük Toronto ərazisində – Port-Houp, Oşava və Riverdeyldə aparılır. 2017-ci ilin mart ayında Bencamin Volfişş filmin musiqi tərtibatçısı qismində işə cəlb edilir.

Film 2017-ci ilin 5 sentyabrında Los-Ancelesin TCL Çin Teatrında ilk nümayişini keçirir, üç gün sonra isə Birləşmiş Ştatlarda 2D və IMAX formatlarında geniş ekranlara çıxır. Tənqidçilərin rəğbətini qazanan film kommersiya baxımından da böyük uğur əldə edərək, dünya üzrə 704 milyon dollar gəlir gətirir, nümayiş olunduğu dövrdə R reytinqli filmlər arasında üçüncü ən yüksək nəticəni göstərir. İnflyasiya nəzərə alınmadan hesablandıqda qorxu janrında çəkilmiş ən gəlirli film statusunu qazanır. Almaniyada 11 gün ərzində 2 milyondan çox tamaşaçı toplaması filmi üç Boqi mükafatına sahib edir.

Tənqidçilər filmdə aktyorların ifasını, rejissor işini, operatorluğu, musiqi tərtibatını yüksək qiymətləndirir, onu Stiven Kinqin əsərləri əsasında çəkilmiş ən uğurlu ekranlaşdırmalardan biri adlandırırlar. Ekran əsəri çoxsaylı mükafatlara namizəd göstərilib – Vaşinqton Kinotənqidçiləri Assosiasiyasının "Ən yaxşı aktyor heyəti" nominasiyası daxil olmaqla iki namizədliyi qazanıb. Film "Tənqidçilərin Seçimi" mükafatının "Ən yaxşı elmi-fantastik/qorxu filmi" nominasiyasına təqdim olunub. Müxtəlif tənqidçilər filmi 2017-ci ilin ən yaxşı ekran əsərləri siyahısına daxil edir. Romanın qalan hissəsini əhatə edən "O: İkinci fəsil" 2019-cu il sentyabrın 6-da ekranlara çıxıb.

Süjet

1988-ci ilin oktyabr ayında, şiddətli yağışın pəncərə şüşələrini döyəclədiyi bir gündə, on iki yaşlı Bill Denbro kiçik qardaşı – altı yaşlı Corci üçün kağızdan incə bir qayıq düzəldir. Corci böyük sevinclə qayığı götürüb küçələrdə sel təki axan yağış sularında üzdürməyə tələsir. Leysan suları bu an zərif qayığı kəskin templə kanalizasiya quyusunun dəmir barmaqlıqlarına doğru itələyir. Oyuncağını özünə qaytarmaq həvəsi ilə quyuya doğru əyilən Corci, qaranlıqdan ona dikilmiş qəribə bir məxluqla – özünü "Kloun Pennivayz" kimi təqdim edən sirk məsxərəçisi ilə göz-gözə gəlir. Əlvan şarlarla uşağın marağını çəkən bu varlıq, qəfildən vəhşi bir hərəkətlə onun qolunu qoparır və onu kanalizasiya sisteminin zülmət dərinliklərinə doğru çəkir.

Bir il ötür. Təqvim yay aylarını, dəqiq desək, 1989-cu ilin iyununu göstərəndə Bill öz dostları – Riçi Tozier, Eddi Kaspbrak və Stenli Uris ilə məktəbin başıpozuqlu uşaqları Henri Bauers, Belç Haqgins, Patrik Hokstetter və Viktor Krissin hədəfinə çevrilir. Henri Bauers başda olmaqla dəstəsi onların ardına düşür. Bütün bunlar yaşanarkən qardaşının yoxa çıxması Bilin qəlbini parçalayır, bu barədə düşünməkdən yuxusu ərşə çəkilir. O düşünür ki, bəlkə Corcinin cəsədi yerli əhalinin Barrens adlandırdığı bataqlıq əraziyə sürüklənib. Qardaşını tapmaq əzmi ilə dostlarını toplayıb axtarışa çıxır, ürəyinin dərinliklərində qardaşının sağ olduğuna ümid bəsləyir. Bu əsnada Billin sinif yoldaşı Ben Henskom şəhərin qaranlıq tarixini araşdırır və aşkar edir ki, şəhərdə əsrlər boyu müəmmalı faciələr baş verib, uşaqlar qeyb olub. Həmin gün məktəb zorbaları tərəfindən təqib edilən Ben, qaçaraq gəldiyi Barrensdə Billin dəstəsi ilə qarşılaşır. Uşaqlar bataqlıqda itkin düşmüş Betti Ripsomun tək ayaqqabısını tapırlar. Şər qarışan o məqamda Patrik Beni axtararkən kanalizasiyada qəribə məxluqların girinə düşür.

Məktəbdə mənfi şöhrət qazanmış Beverli Marş da Uduzanların sırasına qatılır. Qızın məsum gözəlliyi Bill və Beni məftun edir. Dəstənin genişlənməsi bununla bitmir – yetim Mayk Henlonu quldurların əlindən xilas edərək öz dəstələrinə yeni bir dost qazanırlar. Tədricən qrupun hər üzvü Penivaysın dəhşətli təzahürü ilə üzləşir: Ben başsız oğlan kabusu görür, Beverlinin qarşısında qanlı çirkab fışqırır, Eddi cüzamlının hücumuna məruz qalır, Sten divardakı rəsmin canlanmasından dəhşətə gəlir, Mayk valideynlərinin faciəli ölümünü yenidən yaşayır, Bilin gözlərinə qardaşının xəyalı görünür.

Özlərini "Uduzanlar Klubu" adlandıran dostlar araşdırmalarını dərinləşdirir. Müəyyən edirlər ki, bu sirli varlıq hər 27 ildən bir oyanaraq Derri şəhərinin uşaqlarını ova çıxır, sonra yenidən yuxuya gedir. Dəhşət saçan varlıq Neybolt küçəsindəki köhnə evin altındakı daş quyuya açılan kanalizasiya sistemində məskən salıb. Lakin Pennivayz uşaqların axtarışlarını əngəlləməyə çalışır, hər addımda onların qarşısını kəsir. Uşaqlar evə qayıdarkən bir-birlərindən ayrı düşərək dəhşətli anlar yaşayırlar. Hadisələrin gedişində kloun Billə Corci haqqında acı sözlər deyərkən dostlar yenidən cəmləşir və bu məqamda Beverli cəsarətlə məxluqa zərbə endirir.

Beverli zalım atasının əziyyətindən xilas olduğu gün Penivays onu əsarətə salır. Uduzanlar Klubu qəzəb və qorxu içində yenidən toplaşaraq tərk edilmiş evin istiqamətinə ayaq açır. Şüurunu Penivaysın təsirinə təslim edərək öz atasını qətlə yetirmiş Bauers onlara hücum çəkəndə, Mayk onu quyuya yuvarladır. Nəhayət, dostlar qaranlıq dəhlizlərlə irəliləyərək məxluqun məskəninə yetişirlər. Burada çürüməkdə olan sirk əşyaları qalaqlanıb, qurbanların cəsədləri fəzada süzür. Bu mənhus məkanda Penivaysın ağzından saçılan Ölüm İşıqlarından huşunu itirən Beverli yalnız Benin məhəbbət dolu öpüşü ilə özünə gəlir.

Bill qardaşının qiyafəsində zühur edən Penivaysla üzbəüz dayanır. Məxluq Billi əlində saxlayaraq digərlərinə şərtini irəli sürür - əgər Billi ona təslim etsələr, qış yuxusuna çəkiləcəyini vəd edir. Uduzanlar bu təklifi rədd edərək qorxularına qalib gəlib məxluqla döyüşə atılırlar. Uşaqlar nəhayət ki düşmənlərini diz çökdürürlər. Penivays məğlub olaraq kanalizasiyanın dərinliklərinə çəkilir, Bill isə onun qış yuxusunda məhv olacağını bəyan edir. Bill Corcinin plaşını tapır, məhz bununla da qardaşının vəfatı ilə barışır.

Yay öz sonuna yaxınlaşarkən Beverli huşsuz olduğu vaxt gördüklərindən söz açır – böyüdükləri zaman yenidən qarşılaşacaqlar. Uduzanlar and içir ki, Penivays geri dönsə, onlar da Derriyə qayıdacaqlar. Hamı vida edib ayrılır. Beverli səhəri gün Portlenddəki xalasının yanına köçəcəyini bildirir. Ayrılmazdan öncə Bill ürəyini açaraq onu dodaqlarından öpür.

Rollarda

Ceyden Liberer — Vilyam "Bill" Denbro

O, "Uduzanlar Klubu" adlanan uşaq dəstəsinin başçısıdır. Dostlarının köməyi ilə qorxunc varlıqdan qisas almağa and içir. Qardaşını itirməsi səbəbindən bu mübarizə onun üçün şəxsi məsələyə çevrilir. Kəkələməsi və qardaşının faciəsi onu qrupla birləşdirir, liderə çevirir. Rejissor Musketti Denbronun obrazı haqqında qeyd edir: "Bill öz evində sanki bir kölgədir – valideynləri kiçik Corcinin ölümü ilə barışa bilmədiyindən onu görmürlər." Keri Fukunaqanın layihəsində bu rol üçün Tay Simpkins də nəzərdən keçirilib. Liberer öz qəhrəmanını belə təsvir edir: "O çox güclüdür, heç vaxt geri çəkilmir. Düzgün bildiyini edir və sevdiyi insanlar üçün hər şeyə hazırdır." Aktyor bildirir ki, Billin kəkələməsini yaratmaq üçün "YouTube" videolarından və Kolin Fyertin "Kralın nitqi" (2010) filmindəki çıxışından ilhamlanıb. O, müəyyən sözlərdə, hecalarda, hərf və səslərdə kəkələməyi məşq edərək obrazı mənimsəyib.

Bill Skarsqard — O / Rəqs edən kloun Pennivayz

Qədim, ölçülərarası məkanda forma dəyişdirən, hər iyirmi yeddi ildən bir oyanıb dəhşət saçan şər dəniz məxluqudur. Əvvəlcə bu rol Vill Poulterə həvalə edilsə də, iş qrafiki səbəbindən imtina etməli olur. Poulter bildirirdi ki, Fukunaqa filmin rejissoru olanda rolda çəkilməyə razılıq vermişdi, ancaq "New Line" şirkətində vəziyyət dəyişmiş, yeni rejissor təyin edilmişdi. Mark Raylens, Ben Mendelson, Kirk Asevedo, Hüqo Vivinq, Tilda Svinton kimi məşhur aktyorlar rol üçün nəzərdən keçirilirdi. Mendelsohn isə "New Line" şirkətinin qonorarı əhəmiyyətli dərəcədə azaltmaq istəyi səbəbindən layihədən imtina edir. 2016-cı il iyunun 3-də "The Independent" qəzeti son danışıqlardan sonra rejissor Muskettinin Bill Skarsqardı seçdiyini rəsmən açıqlayır. Skarsqard Pennivayzı canlandırarkən obrazın insan təbiətindən uzaq, hətta sosiopatdan belə kənar məxluq olduğunu vurğulayır. Pennivayzın məzəli hesab etdiyi şeylər başqaları üçün qorxunc görünə bilir. Obrazın görünüşü barədə Skarsqard orijinal yanaşma sərgilədiklərini, Tim Karrinin ifasından fərqli məxluq yaratdıqlarını qeyd edir. Aktyor uşaqlarla sıx bağlı olan obrazın uşaq təbiətini, onların təxəyyülünün təcəssümü olduğunu vurğulayır. Prodüser Dan Lin Skarsqardın fiziki görkəminin – hündür, arıq bədən quruluşunun kloun hərəkətlərinə uyğun gəldiyini bildirir. O, obrazı Hit Ledcerin "Coker"i ilə müqayisə edərkən, Skarsqardın tamamilə fərqli, qorxunc obraz yaratdığını söyləyir. Rejissor Musketti Pennivayzın kölgələrdə gizlənmədiyini, öz tamaşasını göstərdiyini, hər kiçik detalın gələcək təhlükədən xəbər verdiyini vurğulayır. Dəhşət hissinin Derrinin özündən qaynaqlandığını, Pennivayzın təsirinin hər yerdə duyulduğunu, gözlənilməsinin belə qorxunc olduğunu qeyd edir. Prodüser Barbara Musketti Skarsqardın yaratdığı obrazı "əcdad kloun" adlandırır, müasir kloun xüsusiyyətlərindən uzaqlaşıb XVIII əsr estetikasına qayıtdıqlarını bildirir.

Ceremi Rey Teylor — Bencamin "Ben" Henskom

Sinif yoldaşları tərəfindən daim təzyiqlərə məruz qalan Bencamin obrazı, Beverli adlı qıza qarşı ürəyində dərin hisslər bəsləyən, utancaq təbiətli, bədəncə iri cüssəli bir məktəblidir. Dəhşətli hadisələrlə dolu Derri şəhərinin keçmişini dostlarına nəql edən Bencamin, təkcə Onun yaratdığı qorxu ilə deyil, eyni zamanda hündürlükdən çəkinmə fobiyası və məktəbdəki ağır psixoloji durumu ilə mübarizə aparır. Muskettinin qeyd etdiyi kimi, gənc Benin həyatında üst-üstə yığılan bu çətinliklər onun xarakterinin formalaşmasında əhəmiyyətli rol oynayır.

Sofiya Lillis — Beverli "Bev" Marş

Evdə zorakı atası ilə mübarizə aparan, Benlə möhkəm dostluq münasibətləri quran oğlanvari qız. Beverli "Uduzanlar Klubu"na mənsub olması onun yaşadığı istismarla deyil, kasıb təbəqədən olması ilə bağlı idi. Musketti Marş obrazı haqqında qeyd edirdi: "Təbii ki, Beverlinin vəziyyəti ən ağırı idi, çünki yetkinlik yaşına çatmamış qıza qarşı cinsi zorakılıq məsələsi var idi". "Rolling Stone"a müsahibəsində Lillis Muskettinin onlara və həmkarlarına Skarsqardla səhnələrdən kənar ünsiyyət qurmağa icazə vermədiyini bildirirdi: "Səhnələrə qədər onu görməyə icazəmiz yox idi, çünki qorxunun təbii alınmasını istəyirdik". Lillis öz qəhrəmanını belə təsvir edirdi: "Kifayət qədər sərt xarakterlidir. Özünü gizlədir, emosiyalarını, hisslərini büruzə vermir. Hamıdan uzaq durur, lakin bu dost qrupunu tapandan sonra onları buraxmaq istəmir, çünki yeganə dostları onlardır. Çox güclü obrazdır". Musketti ilə işləyərkən onlar Marşın atasına qarşı üsyankar davranışını işləyiblər. Lillis obrazı sərbəst şəkildə canlandırmaq imkanına malik olduğunu vurğulayıb: "Filmdə görünməsə də, obrazın keçmişi barədə, xüsusilə anası haqqında çox danışırdıq". Lillis Beverlinin onun üçün nümunə olduğunu, qorxuları ilə üzləşmək cəsarətinə heyranlığını dilə gətirirdi: "Onun haqqında oxuyanda hiss etdim ki, həqiqətən də ona baxıb öyrənə bilərəm. Ona azacıq belə bənzəməyim məni xoşbəxt edərdi". Həmkarları ilə əlaqəsinə gəlincə, Lillis qeyd edirdi ki, aralarında yaranan səmimi dostluq münasibətləri ona öz obrazı ilə daha yaxından bağlanmağa kömək edib: "Beverliyə bənzəyirəm – emosiyalarla necə başa çıxması, Uduzanlar arasında özünü necə aparması baxımından. Aktyorlarla bir yerdə olanda özümü eynilə elə hiss edirdim".

Finn Vulfhard — Riçard "Riçi" Tozier

Billin eynəkli ən yaxın dostu, ağzından çıxanı bilməyən və kobud danışığı ilə tez-tez başını bəlaya salan bir oğlandır. Vulfhard "Instagram" hesabında əsərin baş qəhrəmanlarını canlandıracaq aktyorların Toronto şəhərindəki görüntüsünü "Uduzanlar Klubu Torontoda" başlığı ilə paylaşmışdır. O, 2015-ci ildə Fukunaqanın "O" filmində Tozier roluna seçim turunda iştirak edir və Musketti ilə Fukunaqanın layihələrinin hər ikisində rol alan yeganə aktyor olur. Musketti Tozier obrazı haqqında qeyd edir ki, qrupun ən çox danışanı olması səbəbindən onun şəxsiyyəti barədə məlumat azdır, ancaq diqqət çəkmək istəyi səbəbindən dəstənin təlxəyinə çevrildiyi düşünülür. Vulfard obrazın romandan filmə adaptasiyasındakı dəyişikliklərdən bəhs edərkən bildirir: "Riçi həmişə eyni qalıb. Romandakı bəzi xüsusiyyətlər saxlanılıb, bəziləri isə dəyişdirilib, çünki filmdə dediyimiz sözlərin bir çoxu 50-ci illərdə söylənə bilməzdi." Aktyor Riçi obrazına yanaşmada xüsusi araşdırmaya ehtiyac duymadığını vurğulayır – obrazın təsvirini oxumaq, kitabdakı və mini-serialdakı versiyalar arasındakı fərqləri görmək kifayət edir. GQ-ya müsahibəsində Vulfard çəkiliş meydançasında "Uduzanlar" arasında yaranan dostluğun real həyatda davam etdiyini dilə gətirir. Los-Ancelesdə olarkən Stenli rolunun ifaçısı Uayattın evində qaldığını, şəhərdə və başqa yerlərdə tez-tez görüşdüklərini söyləyir.

Ceyk Dilan Qreyzer — Edvard "Eddi" Kaspbrak

Dostları ilə birlikdə olduğu anlarda özünü həqiqətən xoşbəxt hiss edən zəif bünyəli bir oğlan uşağıdır. Qreyzer xüsusilə emosional bir səhnəni xatırlayaraq bildirir ki, Stenli və ya Uayt sarsıldığı anlarda hamısı bir-birinə sarılıb ağlayır, bu isə dostluğun həqiqiliyini əks etdirən təsirli bir səhnəyə çevrilir. Qreyzer Skarsqardla olan gərgin səhnələrindən zövq aldığını vurğulayır: "Bir səhnədə məni boğduqdan sonra 'Cek, yaxşısan?' deyə soruşdu. Mən də 'Əlbəttə! Bu çox əyləncəli idi! Obrazı necə canlandırdığını bəyənirəm, gəl bir də təkrarlayaq' dedim." Muskettinin iş üslubundan danışarkən, rejissorun səhnələr üçün eskizlərdən istifadə etdiyini qeyd edir. "Obraza uyğunlaşmaq üçün – əslində mən Eddiyə kifayət qədər yaxın idim – fikirlərimizi inadla müdafiə edirdik, mövqeyimizdən geri çəkilmirdik." "Lethal Weapon 2" (1989) və "Batman" (1989) kimi filmlərin ona dövrün ruhunu daha yaxşı anlamaqda və improvizə etməkdə kömək etdiyini dilə gətirir.

Uayatt Oleff — Stenli "Sten" Uris

Ravvinin oğlu, məntiqli düşüncə tərzinə malik bir gənc. Bar mitzvah mərasimi zamanı bir tablodakı ürkünc qadın obrazı tərəfindən təqib edilir. Musketti əsərdəki obrazı dəyişərək, onu ravvinin oğlu kimi təqdim etmiş, bununla da məsuliyyət hissini gücləndirməyə çalışmışdır. Eyni zamanda, Derri şəhərinin yaşlı sakinlərinin hekayəsində təkrarlanan əsas mövzu olan məcburiyyətin təsvirini, atasının təzyiqi ilə göstərir. Oleff ilk səhnəsini xatırlayarkən bildirir ki, bar mitsvah nitqini çəkərkən əzbərləməli olduğu çoxsaylı sətirlərin üzərinə çəkiliş zamanı tam bir paraqraf da əlavə edilib. On saatlıq çəkiliş müddətində sözləri təkrar-təkrar səsləndirmək getdikcə asanlaşıb. Uris obrazı haqqında danışarkən Oleff qeyd etmişdir ki, qrupda Onun real olduğuna ən son inanan Stenli idi, çünki bunu qəbul etmək istəmirdi. Baş verənlər onun gerçəklik anlayışına uyğun gəlmirdi. O hər şeyi nizama salmağa çalışsa da, bunun öhdəsindən gələ bilmir, hər şey dağılırdı. Oleff Stenlinin obsessiv-kompulsiv pozuntusundan danışarkən bildirmişdi ki, o, hər şeyi öz zehnində nizamlamağa çalışır, amma Penivays gəlib hər şeyi bir anda alt-üst edir. Stenli qrup içində ən çox qorxan üzv olmuşdur. "O" filminin sonunda Uris ciddi xəsarət alır. Oleff bununla bağlı qeyd edir ki, Stenli həm fiziki, həm də mənəvi cəhətdən zədələnmişdir. İzlər daimi idi, güzgüyə baxanda izləri görür, baş verənləri xatırlayırdı. Səksəninci illərlə bağlı araşdırmalarında valideynləri ona köməklik göstərmiş, dövrün musiqisi haqqında məlumat vermişlər. Oleff obraza daha yaxşı girə bilmək üçün həmin dövrün musiqilərini dinləmiş, Stenlinin zövqünə uyğun musiqi siyahısı hazırlamışdır. Oleff özünü Stenli ilə müqayisə edərkən onun kimi bəzən hisslərini gizlətdiyini bildirir. Stenli qrupda səsi eşidilməyən "ağıl səsi" idi – özünü real həyatda belə görür.

Çozen Cekobs — Maykl "Mayl" Henlon

Derrinin kənarındakı babasının təsərrüfatında yaşayan təbiətən mülayim qaradərili oğlan. Mayk obrazından bəhs edərkən Cekobs qeyd etmişdir ki, Mayk müstəqil xarakterə malik olsa da, səksəninci illərin övladı idi – tək-tənha böyümüş, qaradərili bir uşaq kimi ağdərililərin üstünlük təşkil etdiyi mühitdə yaşaması onun qəlbində xüsusi bir həssaslıq yaratmışdır. Onu olduğu kimi qəbul edən dostlar tapmaq Mayk üçün böyük əhəmiyyət daşıyır. Cekobs obrazı canlandırarkən vurğulayırdı ki, Mayk ən sədaqətli dost nümunəsidir, çünki tənhalıq içində böyüdüyündən dostluğun dəyərini dərindən anlayır. Cekobs bildirir ki, Maykı oynamaq çətin deyildi, sadəcə öz şəxsiyyətinin ən yaxşı cəhətlərini üzə çıxarmalı idi. Derrinin yeganə afrikalı-amerikalılarından biri olmaq, irqi gərginlik səbəbindən kənarlaşdırılmaq Maykı başqalarının səmimi münasibətinə qarşı daha həssas etmişdi. Cekobs Maykı "Uduzanlar Klubu"ndakı dostları ilə qurduğu əlaqələrdən danışarkən Pennivayzı həyatın çətinliklərinə bənzədir – insanları bir-birinə yaxınlaşdıran məhz bu sınaqlardır. On altı illik ömrünün ən gözəl yayı kimi xatırladığı film çəkilişlərində yetkinləşmə hekayəsi ilə qorxu janrının ustalıqla qovuşduğunu qeyd edir.

Nikolas Hemilton — Henri Bauers

Bauers Dəstəsinin başçısı olan gənc sosiopat. "Uduzanlar Klubu"nun üzvlərini daim təzyiq altında saxlayır. Hemilton obrazla bağlı fikirlərini bölüşərkən qeyd edir ki, əksər filmlərdə rast gəlinən birtərəfli, yalnız baş qəhrəmanı incitmək məqsədi daşıyan zorakı obrazlardan fərqli olaraq, Bauers daha mürəkkəb xarakterə malikdir – atası ilə münasibətləri, onun gözləntilərinə cavab vermək məcburiyyəti kimi bir çox qatları özündə birləşdirir. Hemilton roluna hazırlaşarkən "O" (1990) filmində Cered Blanşardın canlandırdığı eyni personajı dərindən araşdırmış, öz sözləri ilə desək, "orijinal obrazın bütün xüsusiyyətlərini" diqqətlə öyrənmişdi. Blanşard Hemiltona məsləhətlərində Bauers obrazının psixopat təbiətini, qəddarlığını necə təcəssüm etdirməyin yollarını göstərmişdi. Hemilton rolunu təsvir edərkən bildirib: "Personajın qorxunc tərəflərini canlandırmaq, psixotik cəhətlərini tamaşaçıya çatdırmaq mənim üçün maraqlı bir təcrübə oldu." O, Rey Teylor ilə paylaşdığı səhnədən danışarkən: "Onun qarşısında dayanıb dəhşət yaratmalı, üz-üzə gəlməli idim" demişdir. Hemilton filmlərdə rast gəlinən stereotip məktəb zorbasından fərqli olaraq, Bauersi daha mürəkkəb obraz olduğunu vurğulayır: "Bauers adi zorba deyil – onun öz hekayəsi, zəif nöqtələri, müxtəlif xarakter çalarları var. Məhz bu xüsusiyyətlər obrazı maraqlı qılır."

İstehsalı

Mövzular

Musiqisi

Yayımlanması

Qəbulu

Sikvel və prekvel

İstinadlar

http://nmhh.hu/dokumentum/198182/terjesztett_filmalkotasok_art_filmek_nyilvantartasa.xlsx.
It (ing.). 1999.
It (çd.). 1990.
http://www.latimes.com/business/hollywood/la-fi-ct-new-line-it-movie-20170905-story.html.
http://deadline.com/2017/09/it-stephen-king-movie-weekend-box-office-1202161829/.
Box Office Mojo (ing.). 1999.
IMDb (ing.). 1990.

Xarici keçidlər

Vikisitatda O (film, 2017) ilə əlaqədar sitatlar var.

Official website at the Wayback Machine (archived 2017-03-31)
O — Internet Movie Database saytında

[_924cf3141ce66b4b-1] ttp://nmhh.hu/dokumentum/198182/terjesztett_filmalkotasok_art_filmek_nyilvantartasa.xlsx.

[_6131234cec5c6787-2] It (ing.). 1999.

[_79a12d8fde0b5313-3] It (çd.). 1990.

[_d299752c6af0cf25-4] ttp://www.latimes.com/business/hollywood/la-fi-ct-new-line-it-movie-20170905-story.html.

[_38fe2bf4633ce2e3-5] ttp://deadline.com/2017/09/it-stephen-king-movie-weekend-box-office-1202161829/.

[_5da700a8b01a2b79-6] Box Office Mojo (ing.). 1999.

[_582048852236aae6-7] IMDb (ing.). 1990.