Nazim Ələkbərov (general-leytenant)

Nazim Ramiz oğlu Ələkbərov (1960, Bakı) — Azərbaycan Respublikası ədliyyə nazirinin müavini — Penitensiar xidmətin rəisi (2006–2011), ədliyyə general-leytenantı (2009).

Nazim Ələkbərov
Azərbaycan Respublikası ədliyyə nazirinin müavini — Penitensiar xidmətin rəisi
3 aprel 2006 – 14 fevral 2011
Əvvəlki	Aydın Qasımov
Sonrakı	Mədət Quliyev
17 avqust 2006-cı ilədək ədliyyə nazirinin müavini — Məhkəmə Qərarlarının İcrası Baş İdarəsinin rəisi kimi
Şəxsi məlumatlar
Doğum tarixi	1960
Doğum yeri	Bakı, Azərbaycan SSR, SSRİ
Təhsili	Azərbaycan Politexnik İnstitutu (–1982), Azərbaycan Respublikası Daxili İşlər Nazirliyinin Polis Akademiyası (–1996)
Rütbəsi	Ədliyyə general-leytenantı

Həyatı

Nazim Ramiz oğlu Ələkbərov 1960-cı ildə Bakı şəhərində anadan olmuşdur. 1982-ci ildə Azərbaycan Politexnik İnstitutunu mühəndislik, 1996-cı ildə isə Azərbaycan Respublikası Daxili İşlər Nazirliyinin Polis Akademiyasını hüquqşünaslıq ixtisasları üzrə bitirmişdir.

Nazim Ələkbərov 1990-cı ildən Məhkəmə Qərarlarının İcrası Baş İdarəsində əmək fəaliyyətinə başlayaraq burada müxtəlif vəzifələrdə çalışmış, 1999–2001-ci illərdə 1 saylı Xüsusi müəssisənin rəis müavini, 2001–2004-cü illərdə 15 saylı Cəzaçəkmə müəssisəsinin rəisi işləmişdir. 2004-cü ilin may ayında Məhkəmə Qərarlarının İcrası Baş İdarəsinin əməliyyat işləri üzrə rəis müavini vəzifəsinə təyin edilmiş və 2005-ci ilin yanvar ayından isə baş idarənin rəisi vəzifəsini müvəqqəti icra etmişdir.

Azərbaycan Respublikası Prezidentinin 3 aprel 2006-cı il tarixli Sərəncamı ilə Nazim Ələkbərov Azərbaycan Respublikası ədliyyə nazirinin müavini — Məhkəmə Qərarlarının İcrası Baş İdarəsinin rəisi təyin edilmişdir. 17 avqust 2006-cı ildə həmin baş idarənin Penitensiar xidmət adlandırılmasından sonra isə vəzifəsini ədliyyə nazirinin müavini — Penitensiar xidmətin rəisi kimi davam etdirmişdir. Azərbaycan Respublikası Prezidentinin 14 fevral 2011-ci il tarixli Sərəncamı ilə vəzifəsindən azad edilmişdir.

Nazim Ələkbərova 20 noyabr 2006-cı ildə ədliyyə general-mayoru ali hərbi rütbəsi, 18 noyabr 2009-cu ildə isə ədliyyə general-leytenantı ali xüsusi rütbəsi verilmişdir. Ədliyyə Nazirliyi Kollegiyasının 24 dekabr 2008-ci il tarixli qərarı ilə "Azərbaycan ədliyyəsinin 90 illiyi" xatirə medalı ilə təltif edilmişdir.

Ailəlidir, 3 övladı var.

İstinadlar

1. "Ədliyyə nazirinin müavini — Penitensiar xidmətin rəisi Nazim Ramiz oğlu Ələkbərov". justice.gov.az. 6 dekabr 2010 tarixində orijinalından arxivləşdirilib. İstifadə tarixi: 24 aprel 2025.
2. "N. R. Ələkbərovun Azərbaycan Respublikası ədliyyə nazirinin müavini — Məhkəmə Qərarlarının İcrası Baş İdarəsinin rəisi vəzifəsinə təyin edilməsi haqqında Azərbaycan Respublikası Prezidentinin Sərəncamı". e-qanun.az. 3 aprel 2006. İstifadə tarixi: 24 aprel 2025.
3. "Ədliyyə orqanlarının inkişafı haqqında Azərbaycan Respublikası Prezidentinin Fərmanı". e-qanun.az. 17 avqust 2006. İstifadə tarixi: 24 aprel 2025.
4. "N. R. Ələkbərovun Azərbaycan Respublikası ədliyyə nazirinin müavini — Penitensiar xidmətin rəisi vəzifəsindən azad edilməsi haqqında Azərbaycan Respublikası Prezidentinin Sərəncamı". e-qanun.az. 14 fevral 2011. İstifadə tarixi: 24 aprel 2025.
5. "Azərbaycan Respublikası Ədliyyə Nazirliyinin əməkdaşlarına ali xüsusi və ali hərbi rütbələrin verilməsi haqqında Azərbaycan Respublikası Prezidentinin Sərəncamı". e-qanun.az. 20 noyabr 2006. İstifadə tarixi: 24 aprel 2024.
6. "Azərbaycan Respublikası Ədliyyə Nazirliyinin əməkdaşlarına ali xüsusi rütbələrin verilməsi haqqında Azərbaycan Respublikası Prezidentinin Sərəncamı". e-qanun.az. 18 noyabr 2009. İstifadə tarixi: 24 aprel 2024.