Mxmtoon

mxmtoon (emeksemtun; 9 iyul 2000, Oklend, Kaliforniya) — ABŞ-dən olan müğənni-mahnı yazarı, YouTuber. O, ukulele müşayiəti ilə oxuduğu emosional, etirafedici lirikalı mahnılarına görə tanınır. Mxmtoon debüt minialbomu olan "Plum Blossom"-u 2018-ci ildə, "The Masquerade" adlanan debüt studiya albomunu isə 2019-cu ilin sentyabrında çıxarıb. O, 2020-ci ildə "Dawn" və "Dusk" adlı iki minialbom, ardınca da 20 may 2022-ci ildə "Rising" adlı ikinci studiya albomunu buraxıb.

Mxmtoon
Ümumi məlumatlar
Ləqəbi	Mxmtoon
Doğum tarixi	9 iyul 2000(2000-07-09)(24 yaş)
Doğum yeri	Oklend, Alamida qraflığı, Kaliforniya, ABŞ
Musiqiçi məlumatları
Fəaliyyəti	müğənni-mahnı yazarı, YouTuber, videobloger^[d], televiziya prodüseri^[d]
Fəaliyyət illəri	2017-ci ildən
Janrlar	pop musiqisi, bedrum pop^[d], indi-pop
Musiqi aləti	ukulele
Albom şirkəti	AWAL^[d]
mxmtoon.com
Vikianbarda əlaqəli mediafayllar

mxmtoon 2017-ci ildə özünün yazıb ifa etdiyi ilk mahnılarını YouTube-a yerləşdirməyə başlamışdır. O, əvvəlcə musiqi ilə məşğul olduğunu valideynlərindən gizli saxlamışdı. Amma, internetdə onun məşhurluğu yüksəldikcə bu barədə onlara xəbər verməli olub. Mxmtoon ilk mahnılarını öz otağında, GarageBand tətbiqinin köməyilə yazmışdır. O, evində zərb alətləri olmadığından, onun yerinə saç düzləşdiricisindən istifadə etmişdir. O, 2017-ci ildə lou-fay musiqi prodüseri Peachy ilə "Falling for U" mahnısını yazıb. Bu mahnı 2023-cü ilə kimi Spotify-da 100 milyondan çox oxutma toplamışdır. Mxmtoon musiqidən əlavə, Twitch-də canlı yayımlar etməkdədir. Onun podkastları və eyni zamanda, iki dənə qrafik romanı var.

O, hazırda fəaliyyətinə Bruklində davam edir. Oxşar üslublu sənətçilər Cavetown və Kloi Moriondo ilə bir araya gələrək mahnılar yazmışdır.

Həyatı

Əsl adı Maya olan Mxmtoon 9 iyul 2000-ci ildə Kaliforniyanın Oklend şəhərində anadan olub. Anası çinli-amerikalı, atası alman-şotlanddır. O, məktəbdə oxuyarkən rəssamlıq və memarlıq dərslərindən zövq almışdır. Uşaq yaşlarında o, qardaşı skripka dərsləri alan zaman musiqiyə maraq göstərib. Birinci sinifdə oxuyarkən qardaşına qoşularaq onunla bərabər skripka dərsləri alıb. O, sonralar klassik violonçel və truba çalmağı öyrənmişdir.

Maya beşinci sinifdə oxuyarkən məktəbində qurulan rok qrupunda yer almaq üçün dinləmələrə qatılmışdır. O, əvvəlcə həmin qrupda violonçel ifaçısı kimi yer almağı planlaşdırmışdı, lakin dinləmələrdə ondan Oasis-in "Wonderwall" mahnısını oxuması istəndi. Bununla da, o, həmin qrupun vokalisti oldu. Maya dinləmələr zamanı Jimmy Eat World-ün "The Middle" mahnısını oxuduğunu da xatırlayır. Altıncı sinifdə o, gitara çalmağa başlamışdır. Gitaranın necə çalındığını öyrənmək üçün atasından rəhbərlik alıb.

Maya "mxmtoon" adında Instagram hesabı açmışdı. O, bu hesabında özünün çəkdiyi cizgi film üslublu (cartoon) rəsmlərini yerləşdirirdi. O, 2013-cü ildə YouTube kanalı açıb. 6-7-ci sinifdə oxuyarkən ukulele çalmağı öyrənib. İlk mahnısını 13 yaşında olarkən yazıb.

Şəxsi həyatı

Mxmtoon biseksualdır. O, Arctic Monkeys, The Black Keys, Sufjan Stevens və Elliott Smith-i ilham mənbəyi kimi göstərir. Qadın müğənnilərdən isə Clairo-dan ilham aldığını bildirir.

Diskoqrafiya

Studiya albomlar

• The Masquerade (2019)
• Rising (2022)

Kompilasiya albomlar

• Dawn & Dusk (2020)

Mini-albomlar (EP)

• Plum Blossom (2018)
• Plum Blossom (The Edits) (2019)
• The Masquerade (The Edits) (2019)
• Dawn (2020)
• Dawn (The Edits) (2020)
• Dusk (2020)
• Dusk (The Edits) (2021)
• True Colors (from Life Is Strange) (2021)

İstinadlar

1. mxmtoon // AllMusic (ing.). 1991.
2. Chiu D. Pop Singer mxmtoon Talks About Her Latest EP And Social Media Stardom (ing.). // Forbes / S. Forbes NYC: Forbes, 1917. ISSN 0015-6914; 2609-1445
3. Falling for U (ingilis), 2017-08-14, 2023-01-08 tarixində arxivləşdirilib, İstifadə tarixi: 2023-01-08
4. "MXMTOON Talks Influences, Playing Quidditch & More!". youtube.com. November 4, 2019. April 25, 2023 tarixində arxivləşdirilib. İstifadə tarixi: August 7, 2024.

Xarici keçidlər