Elnur Əşrəfoğlu

Elnur Əşrəf oğlu Şükürov (19 iyun 1974, Bakı – 19 oktyabr 2021, Bakı), əsasən Elnur Əşrəfoğlu kimi qeyd olunur — Azərbaycan jurnalisti və televiziya aparıcısı.

Elnur Əşrəfoğlu
Elnur Əşrəf oğlu Şükürov
Doğum tarixi	19 iyun 1974(1974-06-19)
Doğum yeri	Bakı, Azərbaycan SSR, SSRİ
Vəfat tarixi	19 oktyabr 2021(2021-10-19) (47 yaşında)
Vəfat yeri	Bakı, Azərbaycan
Vəfat səbəbi	COVID-19
Dəfn yeri	Saray
Atası	Əşrəf Şükürov
Anası	Zöhrə Hüseynova
Milliyyəti	Azərbaycanlı
İxtisası	Hüquqşünas
Təhsili	Bakı Dövlət Universiteti
Fəaliyyəti	jurnalist, televiziya aparıcısı
Fəaliyyət illəri	1992–2021

Həyatı

Erkən illəri

Uşaqlığı Zəngilan rayonunda keçib.Bakı Dövlət Universitetinin Beynəlxalq Hüquq və Beynəlxalq münasibətlər fakültəsini bitirib.

Jurnalist fəaliyyəti

1992-ci ildə "525-ci qəzet"-də jurnalist kimi çalışıb. Qısa müddət "7 gün" və "Azərbaycan" qəzetləri ilə əməkdaşlıq etdikdən sonra 1993-cü ilin sonlarında Azərbaycan Televiziyasında 16 il işləyib. 1994-cü ildə AZTV-də müəllifi olduğu "Sport digest" əyləncəli idman televiziya verilişindən sonra ölkədə məşhurluq qazanıb. O, müxtəlif vaxtlarda AzTV-nin "Xəbərlər" baş redaksiyasında böyük redaktor, İdman Proqramları Baş Redaksiyasında baş redaktor vəzifələrində çalışıb. Azərbaycan Televiziyasında efirə gedən "Zirvəyə doğru: Sidney-2000", "Afina-2004", "Pekin zəfərləri", "Milli Olimpiya Komitəsi-10 il", "Professor", "9 nömrəli oyunçu", "Böyük hokkey", "Sehrbaz" və daha bir neçə sənədli filmin ərsəyə gəlməsində əməyi olub.

1995-ci ildə İsraildə müstəqil Azərbaycanın xarici ölkədən ilk futbol reportajını aparan şərhçi kimi televiziya tarixinə düşüb.

2011-ci ilin oktyabr ayında "Space TV" telekanalının idman departamentinə rəhbər təyin olunub.

Jurnalistikadan kənar fəaliyyəti

2000-ci ildə Azərbaycan Milli Olimpiya Komitəsinin üzvü, daha sonra "Neftçi" futbol klubunun sözçüsü və prezidentinin müşaviri vəzifələrini icra edib. 2015-ci ildə Azərbaycan Cüdo Federasiyasında baş katibin müavini təyin olub.

Vəfatı

O, sentyabrın əvvəllərində koronavirusa yoluxmuşdu. Elnur Əşrəfoğlunun koronavirusa yoluxduqdan sonra vəziyyətinin ağırlaşmasına səbəb bir böyrəyinin 10 il əvvəl ağır xəstəliklə bağlı götürülməsi olub. Əvvəlcə ev şəraitində müalicə alan jurnalist daha sonra Bakıda "Yeni Klinika"ya köçürülmüşdü. 2021-ci il oktyabrın 19-da koronavirusdan vəfat edib.

O, oktyabrın 20-də Saray qəsəbəsindəki qəbiristanlıqda torpağa tapışırılıb.

Şəxsi həyatı

"Liverpul" futbol klubunun azarkeşi idi. Dünyanın 102 ölkəsinə səfər edib.

Ailəli idi, iki övladı var.

İrsi

2021-ci il oktyabrın 21-də Elnur Əşrəfoğlunun xatirəsi "Qarabağ" və Qazaxıstanın "Kayrat" komandaları arasında UEFA Konfrans Liqasının qrup mərhələsinin üçüncü tur oyunundan əvvəl anılıb. Ağdam klubunun təşəbbüsü ilə matçın başlamasına bir saat qalmış Tofiq Bəhramov adına Respublika stadionunun bütün tablolarında Əşrəfoğlunun fotosu əks olunub. 2021-ci il oktyabrın 23-də "Neftçi" klubunun "Zirə"yə qarşı keçirəcəyi Azərbaycan Premyer Liqasının səkkizinci tur oyunu jurnalistin vəfatı ilə əlaqədar bir dəqiqəlik sükutla başlayıb.

2022-ci il iyunun 29-da Azərbaycan Minifutbol Federasiyası və "Azfar Group"un dəstəyilə Elnur Əşrəfoğlunun xatirəsinə həsr olunan oyun keçirib.

2022-ci ildə haqqında "Elnur Əşrəfoğlu xatirələrdə" yazılıb.

İstinadlar

1. "Azərbaycanlı telejurnalist ermənilərlə kütləvi davaya düşdü". publika.az. publika.az. 2021-10-26 tarixində . İstifadə tarixi: 22 oktyabr 2021.
2. "Tanınmış idman jurnalisti ad gününü qeyd edir". qol.az. qol.az. 2023-07-08 tarixində . İstifadə tarixi: 19 oktyabr 2021.
3. "Yolu "525"dən keçən idman jurnalistləri". sportal.az. sportal.az. 2021-10-23 tarixində . İstifadə tarixi: 2021-10-19.
4. "Koronavirusdan vəfat edən Elnur Əşrəfoğlu kim idi? - DOSYE". sfera.az. sfera.az. 2021-10-21 tarixində . İstifadə tarixi: 20 oktyabr 2021.
5. "Elnur Əşrəfoğlu "Space"in idman departamentinin rəhbəri oldu". qol.az. qol.az. 2021-10-29 tarixində . İstifadə tarixi: 19 oktyabr 2021.
6. "Elnur Əşrəfoğlu vəfat etdi". fanat.az. fanat.az. 2021-10-26 tarixində . İstifadə tarixi: 19 oktyabr 2021.
7. "Jurnalist Elnur Əşrəfoğlu koronavirusdan vəfat edib". report.az. report.az. 2021-10-28 tarixində . İstifadə tarixi: 2021-10-19.
8. "Elnur Əşrəfoğlu dəfn olunub". report.az. report.az. 2021-10-22 tarixində . İstifadə tarixi: 20 oktyabr 2021.
9. ""Qərar verdim ki, Moldova millisində çıxış edım" - Elnur Əşrəfoğlu seçiminin sirrini açdı". qaynarinfo.az. qaynarinfo.az. 2021-10-29 tarixində . İstifadə tarixi: 19 oktyabr 2021.
10. "Elnur Əşrəfoğlu "Qarabağ" - "Kayrat" oyunundan əvvəl anılıb". report.az. report.az. 2022-08-27 tarixində . İstifadə tarixi: 22 oktyabr 2021.
11. ""Neftçi" - "Zirə" oyunu bir dəqiqəlik sükutla başlayacaq". fanat.az. fanat.az. 2021-10-25 tarixində . İstifadə tarixi: 22 oktyabr 2021.
12. "Elnur Əşrəfoğlunun xatirəsinə həsr olunan oyunda 12 qol - FOTOLAR". msport.az. msport.az. 2023-07-08 tarixində . İstifadə tarixi: 30 iyun 2022.
13. Baku TV. ""Elnur Əşrəfoğlu xatirələrdə" kitabının təqdimatı olub" (az.). Youtube.com. 17.10.2022. 2022-10-17 tarixində . İstifadə tarixi: 2022-10-17.

Xarici keçidlər

Vikisitatda Elnur Əşrəfoğlu ilə əlaqədar sitatlar var.